തെരുവ് നായയെ പ്രകൃതിവിരുദ്ധ പീഡനത്തിനിരയാക്കി കൊലപ്പെടുത്തിയ യുവാവ് പിടിയിൽ

ലഖ്നൗ: ഉത്തര്‍പ്രദേശിലെ മഥുരയില്‍ തെരുവ് നായയെ ലൈംഗികമായി പീഡിപ്പിച്ച് കൊലപ്പെടുത്തിയ സംഭവത്തില്‍ യുവാവ് പിടിയിലായി. ബിഹാര്‍ സ്വദേശിയായ ബിഹാരി (35) എന്നയാളെയാണ് പോലീസ് അറസ്റ്റ് ചെയ്തത്. മഥുരയിലെ ഗൗര നഗറിലാണ് മനസ്സാക്ഷിയെ ഞെട്ടിച്ച ഈ സംഭവം നടന്നത്.

പ്രതിയുടെ വീടിന് പിന്നിലെ കുറ്റിക്കാട്ടില്‍ നായയുടെ ജഡം കിടക്കുന്നത് ശ്രദ്ധയില്‍പ്പെട്ട നാട്ടുകാരാണ് പോലീസിനെ വിവരം അറിയിച്ചത്.

 പ്രാഥമിക അന്വേഷണത്തില്‍ നായ പീഡനത്തിനിരയായതായി കണ്ടെത്തി. പ്രതിയുടെ വീടിനുള്ളില്‍ രക്തക്കറ കണ്ടെത്തിയത് കുറ്റകൃത്യത്തിന്റെ ആഘാതം വ്യക്തമാക്കുന്നു.

ശാസ്ത്രീയ തെളിവുകളുടെയും നാട്ടുകാരുടെ മൊഴിയുടെയും അടിസ്ഥാനത്തില്‍ പോലീസ് പ്രതിയെ ഉടന്‍ തന്നെ കസ്റ്റഡിയിലെടുത്തു.

ഭക്ഷണം നല്‍കാമെന്ന് പ്രലോഭിപ്പിച്ചാണ് പ്രതി തെരുവ് നായയെ വീട്ടിലേക്ക് കൊണ്ടുപോയതെന്ന് പ്രദേശവാസികള്‍ ആരോപിച്ചു. പീഡനത്തിന് ശേഷം നായയെ കൊലപ്പെടുത്തി ജഡം വീടിന് പുറത്തെ കുറ്റിക്കാട്ടില്‍ ഉപേക്ഷിക്കുകയായിരുന്നുവെന്നും ഇവര്‍ പറഞ്ഞു.

മൃഗങ്ങളോടുള്ള ക്രൂരത തടയല്‍ നിയമപ്രകാരം പ്രതിക്കെതിരെ കേസെടുത്തിട്ടുണ്ട്. സംഭവത്തില്‍ കൂടുതല്‍ വിശദമായ അന്വേഷണം നടന്നുവരികയാണെന്ന് സര്‍ക്കിള്‍ ഓഫീസര്‍ പീതം പാല്‍ സിങ് വ്യക്തമാക്കി.