പാകിസ്ഥാന് വേണ്ടി ചാരപ്പണി നടത്തിയ ഡിആർഡിഒ ജീവനക്കാരൻ അറസ്റ്റിൽ

ജയ്പൂര്‍: പാകിസ്ഥാനു വേണ്ടി ചാരപ്പണി നടത്തിയ ഡിആര്‍ഡിഒ ജീവനക്കാരനെ സുരക്ഷാ ഏജന്‍സികള്‍ തിങ്കളാഴ്ച രാത്രി അറസ്റ്റ് ചെയ്തു. ഉത്തരാഖണ്ഡിലെ അല്‍മോറയില്‍ താമസിക്കുന്ന മഹേന്ദ്ര പ്രസാദ് എന്ന പ്രതിയാണ് അറസ്റ്റിലായത്.

ഇന്ത്യ-പാകിസ്ഥാന്‍ അന്താരാഷ്ട്ര അതിര്‍ത്തിയോട് ചേര്‍ന്നുള്ള ജയ്‌സാല്‍മീറിലെ പ്രതിരോധ ഗവേഷണ വികസന സംഘടനയുടെ (ഡിആര്‍ഡിഒ) വിശ്രമ കേന്ദ്രത്തിന്റെ മാനേജരായി മഹേന്ദ്ര ജോലി ചെയ്യുകയായിരുന്നു. 

ഈ വിശ്രമ കേന്ദ്രം വളരെ സെന്‍സിറ്റീവ് ആയി കണക്കാക്കപ്പെടുന്നു. ഇന്ത്യന്‍ സൈനിക ഉദ്യോഗസ്ഥരും വിദഗ്ധരും ശാസ്ത്രജ്ഞരും പതിവായി ഇവിടെ വന്ന് താമസിക്കുന്നു.

സൈനിക തിരച്ചില്‍, പരിശോധന, അഭ്യാസങ്ങള്‍, നടപടി എന്നിവയുമായി ബന്ധപ്പെട്ട് ഇവിടെ യോഗങ്ങള്‍ നടക്കുന്നു. പ്രതിയെ ചൊവ്വാഴ്ച സംയുക്ത അന്വേഷണ സമിതിക്ക് കൈമാറിയതായി ജയ്‌സാല്‍മീര്‍ ജില്ലാ പോലീസ് സൂപ്രണ്ട് അഭിഷേക് ശിവഹാരെ പറഞ്ഞു. ഇപ്പോള്‍ സംയുക്ത അന്വേഷണ സമിതി പ്രതിയെ ചോദ്യം ചെയ്യും.