ജമ്മുവിൽ പാക് ബന്ധമുള്ള മയക്കുമരുന്ന് സംഘം പിടിയിൽ; 15 കോടി രൂപ വിലമതിക്കുന്ന 3 കിലോ ഹെറോയിൻ പിടികൂടി

ഡല്‍ഹി: ജമ്മുകശ്മീരില്‍ മൂന്ന് കിലോഗ്രാം ഹെറോയിന്‍ കൈവശം വച്ച രണ്ട് പേരെ ശനിയാഴ്ച അറസ്റ്റ് ചെയ്തു. ഏകദേശം 15 കോടി രൂപ വിലമതിക്കുന്ന ഹെറോയിനാണ് ഇവിടെ നിന്ന് പിടികൂടിയത്.  ശാസ്ത്രി നഗറിലെ  ഒരു ശ്മശാനത്തിന് സമീപത്ത് നിന്നാണ് ഇരുവരേയും പോലീസ് അറസ്റ്റ് ചെയ്യുന്നത്.

സൗത്ത് സബ് ഡിവിഷണല്‍ പോലീസ് ഓഫീസറുടെ നേതൃത്വത്തിലുള്ള പട്രോളിംഗ് സംഘവും ഗാന്ധി നഗര്‍ പോലീസ് സ്റ്റേഷനിലെ എസ്എച്ച്ഒയുമാണ് ഓപ്പറേഷന് പിന്നിലെന്ന് ജമ്മുവിലെ സീനിയര്‍ പോലീസ് സൂപ്രണ്ട് (എസ്എസ്പി) ജോഗീന്ദര്‍ സിംഗ് പറഞ്ഞു. 

കച്ചവടക്കാരില്‍ നിന്ന് ഏകദേശം 3.260 കിലോഗ്രാം ഹെറോയിന്‍ പിടിച്ചെടുത്തു. ഈ കണ്ടെത്തല്‍ മേഖലയിലെ മയക്കുമരുന്ന് കടത്തുകാര്‍ക്ക് പ്രധാനമായ തിരിച്ചടിയാണെന്നും അദ്ദേഹം പറഞ്ഞു. 

നാര്‍ക്കോട്ടിക് ഡ്രഗ്‌സ് ആന്‍ഡ് സൈക്കോട്രോപിക് സബ്സ്റ്റന്‍സസ് (എന്‍ഡിപിഎസ്) ആക്ട്, ഭാരതീയ ന്യായ സംഹിത (ബിഎന്‍എസ്) എന്നീ വകുപ്പുകള്‍ പ്രകാരം കേസ് രജിസ്റ്റര്‍ ചെയ്ത ശേഷം പോലീസ് അന്വേഷണം നടത്തിവരികയാണെന്ന് ഉദ്യോഗസ്ഥര്‍ പറഞ്ഞു.