അമിത് ഷാ 150 ജില്ലാ മജിസ്‌ട്രേറ്റുമാരെ ഫോണിൽ വിളിച്ചെന്ന് ജയറാം രമേശ്; വിശദാംശങ്ങള്‍ തേടി തിരഞ്ഞെടുപ്പ് കമ്മീഷന്‍

ന്യൂഡല്‍ഹി: വോട്ടെണ്ണലിന് ദിവസങ്ങൾക്ക് മുമ്പ് കേന്ദ്ര ആഭ്യന്തരമന്ത്രി അമിത് ഷാ 150 ജില്ലാ മജിസ്‌ട്രേറ്റുമാരെ ഫോണിൽ വിളിച്ചെന്ന ആരോപണത്തിൽ കോൺഗ്രസ് നേതാവ് ജയറാം രമേശിനോട് തിരഞ്ഞെടുപ്പ് കമ്മീഷൻ വിശദമായ വിവരങ്ങൾ തേടി.

ജില്ലാ മജിസ്‌ട്രേറ്റുകളും/കളക്‌ടർമാരുമാണ് തിരഞ്ഞെടുപ്പ് സമയത്ത് അതത് ജില്ലകളിലെ റിട്ടേണിംഗ് ഓഫീസർമാർ. 

ഒരു ജില്ലാ മജിസ്‌ട്രേറ്റും അനാവശ്യ സ്വാധീനം അനുഭവിച്ചതായി റിപ്പോർട്ട് ചെയ്തിട്ടില്ലെന്ന് കമ്മീഷൻ പറഞ്ഞു.  എന്നിരുന്നാലും, ഒരു മുതിർന്ന നേതാവ് ഉന്നയിച്ച ആരോപണങ്ങളുടെ ഗൗരവം കണക്കിലെടുത്ത്, നിർദ്ദിഷ്ട വിശദാംശങ്ങൾ ലഭിക്കണമെന്ന് തിരഞ്ഞെടുപ്പ് കമ്മീഷൻ  വ്യക്തമാക്കി.