ഉദ്ധവ് താക്കറെയ്ക്ക് ഒപ്പമുള്ളത് കോണ്‍ഗ്രസിന്റെ വോട്ട്ബാങ്ക്, സേനാ വോട്ടര്‍മാര്‍ ഞങ്ങള്‍ക്കൊപ്പം, തിരഞ്ഞെടുപ്പില്‍ നിര്‍ണ്ണായക വിജയം നേടുന്നതിലാണ് തങ്ങളുടെ ശ്രദ്ധയെന്ന് ഏകനാഥ് ഷിന്‍ഡെ

മുംബൈ: വരാനിരിക്കുന്ന നിയമസഭാ തെരഞ്ഞെടുപ്പില്‍ കോണ്‍ഗ്രസിന്റെ വോട്ട് ബാങ്കിനെ ആശ്രയിക്കുന്നുവെന്ന് ആരോപിച്ച് ശിവസേന (യുബിടി) തലവന്‍ ഉദ്ധവ് താക്കറെയ്ക്കെതിരെ രൂക്ഷമായ ആക്രമണം നടത്തി മഹാരാഷ്ട്ര മുഖ്യമന്ത്രി ഏകനാഥ് ഷിന്‍ഡെ രംഗത്ത്.

ഭരണകക്ഷിയായ മഹായുതി സഖ്യത്തിനുള്ളിലെ പിളര്‍പ്പിനെക്കുറിച്ചുള്ള ആരോപണങ്ങളും ഷിന്‍ഡെ തള്ളിക്കളഞ്ഞു. തിരഞ്ഞെടുപ്പില്‍ നിര്‍ണ്ണായക വിജയം നേടുന്നതിലാണ് തങ്ങളുടെ ശ്രദ്ധ തുടരുന്നതെന്നും അദ്ദേഹം പറഞ്ഞു.

അടുത്തിടെ നടന്ന ലോക്സഭാ തെരഞ്ഞെടുപ്പിലെ ശിവസേനയുടെ (യുബിടി) നേരിയ വിജയത്തിന് കാരണം സ്വന്തം ശക്തിയേക്കാള്‍ കോണ്‍ഗ്രസിന്റെ പിന്തുണയെ ആശ്രയിച്ചതു മൂലമാണെന്ന് ഷിന്‍ഡെ പറഞ്ഞു.

ഉദ്ധവ് താക്കറെക്ക് കോണ്‍ഗ്രസിന്റെ വോട്ട് ബാങ്ക് ഉണ്ട്. ലോക്സഭാ തെരഞ്ഞെടുപ്പിലെ അവരുടെ നേരിയ കുതിപ്പിന് പിന്നിലെ പൂര്‍ണ കാരണം കോണ്‍ഗ്രസാണ്. ശിവസേനയുടെ അടിസ്ഥാന വോട്ടര്‍മാര്‍ ഞങ്ങള്‍ക്കൊപ്പമാണെന്നും മുഖ്യമന്ത്രി പറഞ്ഞു.

പൊതുതെരഞ്ഞെടുപ്പില്‍ മഹാരാഷ്ട്രയിലെ വോട്ടര്‍മാര്‍ തങ്ങളുടെ നിലപാട് വ്യക്തമാക്കിയതായും വോട്ടിംഗ് സ്ഥിതിവിവരക്കണക്കുകള്‍ ഉയര്‍ത്തിക്കാട്ടി ഷിന്‍ഡെ പറഞ്ഞു.

അവരുടെ സ്ട്രൈക്ക് റേറ്റ് 42 ശതമാനമായിരുന്നപ്പോള്‍ ഞങ്ങളുടേത് 48 ശതമാനമായിരുന്നു. ശിവസേനയ്ക്ക് ലഭിച്ച 19 ശതമാനം വോട്ടില്‍ 13 ശതമാനവും ഞങ്ങളുടേതായിരുന്നു.

കൊങ്കണ്‍, താനെ, സംഭാജി നഗര്‍ എന്നിവിടങ്ങളില്‍ സീറ്റ് ഉറപ്പിക്കുന്നതില്‍ അവര്‍ പരാജയപ്പെട്ടതില്‍ നിന്ന് ഇത് വ്യക്തമാണ്. നിയമസഭാ തെരഞ്ഞെടുപ്പിലും സമാന ഫലങ്ങള്‍ പ്രതിഫലിക്കുമെന്നും അദ്ദേഹം വ്യക്തമാക്കി.