കല്യാൺ ഡോംബിവ്‌ലി മുനിസിപ്പൽ കോർപ്പറേഷൻ തിരഞ്ഞെടുപ്പ്: ബിജെപി, ശിവസേന പ്രവർത്തകർ ഏറ്റുമുട്ടി ഒരാൾക്ക് പരിക്ക്

മുംബൈ: ചൊവ്വാഴ്ച പണ വിതരണത്തെച്ചൊല്ലി ബിജെപി, ശിവസേന (ഏക്‌നാഥ് ഷിന്‍ഡെ വിഭാഗം) പ്രവര്‍ത്തകര്‍ തമ്മില്‍ അക്രമാസക്തമായ സംഘര്‍ഷം ഉണ്ടായി. ബിജെപി സ്ഥാനാര്‍ത്ഥി ആര്യ ഓംകാര്‍ നാഥ് നടേക്കറുടെ ഭര്‍ത്താവ് ഓംകാര്‍ നാഥ് നടേക്കറിന് സംഘര്‍ഷത്തില്‍ പരിക്കേറ്റു.

കല്യാണ്‍ ഡോംബിവ്ലി മുനിസിപ്പല്‍ കോര്‍പ്പറേഷന്‍ തിരഞ്ഞെടുപ്പിന് രണ്ട് ദിവസം മുമ്പാണ് അക്രമാസക്തമായ സംഘര്‍ഷം റിപ്പോര്‍ട്ട് ചെയ്യപ്പെട്ടത്. ഏകനാഥ് ഷിന്‍ഡെ വിഭാഗം സ്ഥാനാര്‍ത്ഥി നിതിന്‍ മത്യ പാട്ടീലിന്റെ അനുയായികളാണ് ആക്രമണം നടത്തിയതെന്ന് ബിജെപി ആരോപിച്ചു.

മഹാരാഷ്ട്രയിലെ 29 മുനിസിപ്പല്‍ കോര്‍പ്പറേഷന്‍ തിരഞ്ഞെടുപ്പുകളുടെ പ്രചാരണത്തിന്റെ അവസാന ദിവസമാണ് ഇന്ന്. രാവിലെ 11 മണി മുതല്‍ മുഖ്യമന്ത്രി ദേവേന്ദ്ര ഫഡ്നാവിസ് നാഗ്പൂരില്‍ റോഡ് ഷോ നടത്തും, റോഡ് ഷോയ്ക്കിടെ അദ്ദേഹം സ്വയം മോട്ടോര്‍ സൈക്കിളില്‍ സഞ്ചരിക്കും. 

പൂനെയില്‍, ഉച്ചയ്ക്ക് 1:30 ന് മുഖ്യമന്ത്രി പ്രചാരണ റാലിയെ അഭിസംബോധന ചെയ്യും. രാവിലെ 9 മുതല്‍ ഉച്ചയ്ക്ക് 1:30 വരെ നടക്കുന്ന അജിത് പവാറിന്റെ പൂനെയിലെ റോഡ് ഷോയുടെ അവസാന ദിവസം കൂടിയാണ് ഇന്ന്.