വോട്ട് മോഷണ ആരോപണങ്ങള്‍ക്കിടെ കോണ്‍ഗ്രസിന് കത്തെഴുതി തെരഞ്ഞെടുപ്പ് കമ്മീഷന്‍, ജയറാം രമേശിനെ കൂടിക്കാഴ്ചയ്ക്ക് വിളിച്ചു

ഡല്‍ഹി: തിങ്കളാഴ്ച ഉച്ചയ്ക്ക് 12 മണിക്ക് തിരഞ്ഞെടുപ്പ് കമ്മീഷന്‍ കോണ്‍ഗ്രസ് പാര്‍ട്ടിയെ ചര്‍ച്ചയ്ക്ക് വിളിച്ചിട്ടുണ്ട്. കോണ്‍ഗ്രസ് എംപി ജയറാം രമേശിന് അയച്ച കത്തില്‍ കമ്മീഷന്‍ നിങ്ങളുടെ അഭ്യര്‍ത്ഥന പരിഗണിച്ചതായും ചര്‍ച്ചകള്‍ക്ക് സമയം നല്‍കാന്‍ തീരുമാനിച്ചതായും ഇന്ത്യന്‍ തിരഞ്ഞെടുപ്പ് കമ്മീഷന്‍ സെക്രട്ടേറിയറ്റ് പറഞ്ഞു.

ചില രാഷ്ട്രീയ പാര്‍ട്ടികള്‍ നടത്തിയ അഭ്യര്‍ത്ഥന മാനിച്ചാണ് ഇത്തവണ ജയറാം രമേശിന് സമയം നല്‍കിയിരിക്കുന്നത്.

സ്ഥലക്കുറവ് കാരണം, ചര്‍ച്ചകള്‍ക്കായി പരമാവധി 30 പേരുടെ പേരുകളും അവരുടെ വാഹന നമ്പറുകളും നല്‍കാന്‍ തിരഞ്ഞെടുപ്പ് കമ്മീഷന്‍ ആവശ്യപ്പെട്ടിട്ടുണ്ട്. ഈ കത്തില്‍ യോഗത്തിന്റെ അജണ്ടയെക്കുറിച്ച് പരാമര്‍ശമില്ല.

ബീഹാറിലെ സ്‌പെഷ്യല്‍ ഇന്റന്‍സീവ് റിവിഷന്‍ (എസ്ഐആര്‍) സംബന്ധിച്ച് പ്രതിപക്ഷം നിരന്തരം ചോദ്യങ്ങള്‍ ഉന്നയിക്കുകയും തിരഞ്ഞെടുപ്പ് കമ്മീഷനെ 'വോട്ട് മോഷണം' ആരോപിച്ച് കുറ്റപ്പെടുത്തുകയും ചെയ്യുന്നുണ്ട്.

ബീഹാറിലെ എസ്ഐആറിനെതിരെ പ്രതിഷേധിച്ച്, ഇന്ത്യാ സഖ്യം പാര്‍ലമെന്റില്‍ നിന്ന് തിരഞ്ഞെടുപ്പ് കമ്മീഷന്റെ ഓഫീസിലേക്ക് പ്രതിഷേധ മാര്‍ച്ച് പ്രഖ്യാപിച്ചു.

പ്രതിഷേധ മാര്‍ച്ച് പ്രഖ്യാപിച്ചുകൊണ്ട് മുതിര്‍ന്ന കോണ്‍ഗ്രസ് നേതാവ് ദിഗ്വിജയ് സിംഗ്, എല്ലാ ബിഎല്‍ഒമാരും ഒരു മുറിയില്‍ ഇരുന്ന് 'വ്യാജ ഫോമുകള്‍' പൂരിപ്പിക്കുകയാണെന്ന് ആരോപിച്ചു. 

നിരവധി പേര്‍ മരിച്ചുവെന്ന് തിരഞ്ഞെടുപ്പ് കമ്മീഷന്‍ പറയുന്നു, പക്ഷേ അവരുടെ പട്ടിക പുറത്തുവിടുന്നില്ല. ഇതുമായി ബന്ധപ്പെട്ട്, തിങ്കളാഴ്ച പാര്‍ലമെന്റ് ഹൗസില്‍ നിന്ന് തിരഞ്ഞെടുപ്പ് കമ്മീഷന്‍ ഓഫീസിലേക്ക് ഇന്ത്യാ സഖ്യം പ്രതിഷേധ മാര്‍ച്ച് നടത്തും.