മഹാരാഷ്ട്രയിൽ മൃഗങ്ങളിൽ നിന്ന് സംരക്ഷിക്കാൻ വയലുകളിൽ വൈദ്യുത വയറുകൾ സ്ഥാപിച്ചു, ഒരേ കുടുംബത്തിലെ അഞ്ച് പേർ വൈദ്യുതാഘാതമേറ്റ് മരിച്ചു

മുംബൈ: വടക്കന്‍ മഹാരാഷ്ട്രയിലെ ജല്‍ഗാവ് ജില്ലയിലെ ഒരു വയലില്‍ വൈദ്യുതാഘാതമേറ്റ് ഒരു കുടുംബത്തിലെ അഞ്ച് പേര്‍ മരിച്ചു. വന്യമൃഗങ്ങളില്‍ നിന്ന് വിളകളെ സംരക്ഷിക്കുന്നതിനായി വയലിന് ചുറ്റും വൈദ്യുത വയറുകള്‍ സ്ഥാപിച്ചിരുന്നു.

ഈ വയറുകളില്‍ സ്പര്‍ശിച്ചപ്പോഴാണ് സംഭവം. മരിച്ചവരില്‍ രണ്ട് കുട്ടികളും ഉള്‍പ്പെടുന്നു. രണ്ട് കാട്ടുപന്നികളെയും സംഭവസ്ഥലത്ത് തന്നെ ചത്ത നിലയില്‍ കണ്ടെത്തി. ചൊവ്വാഴ്ച രാത്രി വര്‍ക്കേഡി ഗ്രാമത്തിലാണ് സംഭവം.

യുവാവ്, ഭാര്യ, ഒരു വൃദ്ധ, രണ്ട് ആണ്‍കുട്ടികള്‍ എന്നിവരെ മരിച്ച നിലയില്‍ കണ്ടെത്തിയതായി ഒരു ഉദ്യോഗസ്ഥന്‍ പറഞ്ഞു. ഒരു ഗ്രാമീണന്‍ വയലിലൂടെ കടന്നുപോകുകയായിരുന്നു.

അപ്പോള്‍ അഞ്ച് പേര്‍ ബോധരഹിതരായി കിടക്കുന്നതും അവരുടെ അടുത്ത് ഒരു പെണ്‍കുട്ടി കരയുന്നതും അദ്ദേഹം കണ്ടു.

തുടര്‍ന്ന് അദ്ദേഹം ഗ്രാമത്തലവനെയും പോലീസിനെയും വിവരമറിയിച്ചു. ഉടന്‍ തന്നെ ഒരു സംഘം പോലീസ് സ്ഥലത്തെത്തി എല്ലാവരെയും ആശുപത്രിയിലേക്ക് കൊണ്ടുപോയി, അവിടെ വെച്ച് അവര്‍ മരിച്ചതായി പ്രഖ്യാപിച്ചു.

വയലിന് ചുറ്റും സ്ഥാപിച്ചിരുന്ന വൈദ്യുതി വയറില്‍ തട്ടിയതാകാം അപകടകാരണമെന്ന് പോലീസ് ഉദ്യോഗസ്ഥര്‍ പറഞ്ഞു. മരിച്ചവരെക്കുറിച്ചുള്ള വിശദമായ വിവരങ്ങള്‍ ശേഖരിച്ചുവരികയാണ്.