ദേവേന്ദ്ര ഫഡ്നാവിസ് ഔറംഗസേബിനെപ്പോലെ ക്രൂരനാണെന്ന് മഹാരാഷ്ട്ര കോണ്‍ഗ്രസ് പ്രസിഡന്റ് ഹര്‍ഷവര്‍ദ്ധന്‍ സപ്കല്‍. കോണ്‍ഗ്രസ് മഹാരാഷ്ട്രയുടെ സ്വത്വത്തെ അപമാനിക്കുന്നു. ബുദ്ധിമാന്‍മാരായ മഹാരാഷ്ട്രയിലെ ജനങ്ങള്‍ സപ്കലിനും കോണ്‍ഗ്രസിനും അവരുടെ സ്ഥാനം കാണിച്ചുകൊടുക്കുമെന്ന് തിരിച്ചടിച്ച് ബിജെപി

മുംബൈ: ഔറംഗസേബിനെച്ചൊല്ലി മഹാരാഷ്ട്രയില്‍ രാഷ്ട്രീയം ചൂടുപിടിച്ചിരിക്കുകയാണ്. മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ് ഔറംഗസേബിനെപ്പോലെ ക്രൂരനാണെന്ന് കോണ്‍ഗ്രസ് പ്രസിഡന്റ് ഹര്‍ഷവര്‍ദ്ധന്‍ സപ്കല്‍ പറഞ്ഞു. കോണ്‍ഗ്രസ് പ്രസിഡന്റിന്റെ ഈ പ്രസ്താവനയിയെ ബിജെപി ബാലിശമെന്നാണ് വിശേഷിപ്പിച്ചത്. 

ഔറംഗസേബ് ഒരു ക്രൂരനായ ഭരണാധികാരിയായിരുന്നു. അയാള്‍ തന്റെ പിതാവിനെ ജയിലിലടച്ചു, സ്വന്തം ജ്യേഷ്ഠനെ കൊന്ന് വെട്ടിമാറ്റിയ തല ഡല്‍ഹിയിലുടനീളം പ്രദര്‍ശിപ്പിച്ചു. ഇളയ സഹോദരനെ ഭ്രാന്തനാണെന്ന് പ്രഖ്യാപിച്ചു കൊന്നു. 

അദ്ദേഹം മതം ആവശ്യത്തിനായി ഉപയോഗിച്ചിരുന്നുവെങ്കിലും ഒരിക്കലും ഹജ്ജിന് പോലും പോയിട്ടില്ല. അയാള്‍ ഒരു ക്രൂരനായ ഭരണാധികാരിയായിരുന്നു.

'ഇന്നത്തെ കാലത്ത് ദേവേന്ദ്ര ഫഡ്നാവിസും അത്രയും ക്രൂരനാണ്' എന്നാണ് കോണ്‍ഗ്രസ് പ്രസിഡന്റ് ഹര്‍ഷ് വര്‍ധന്‍ സപ്കല്‍ പറഞ്ഞത്. 

അയാളും എപ്പോഴും മതത്തെ ആശ്രയിക്കുന്നുവെന്നും സപ്കല്‍ പറഞ്ഞു. മധ്യപ്രദേശിലെ സഹോദരിമാരും പെണ്‍മക്കളും സുരക്ഷിതരല്ല. ഔറംഗസേബിന്റെയും ദേവേന്ദ്ര ഫഡ്നാവിസിന്റെയും സ്വഭാവം കൃത്യമായി ഒന്നുതന്നെയാണെന്നും സപ്കല്‍ പറഞ്ഞു.

'മഹാരാഷ്ട്ര കോണ്‍ഗ്രസ് പ്രസിഡന്റ് ഹര്‍ഷ് വര്‍ധന്‍ സപ്കലിന്റെ പ്രസ്താവന വളരെ ബാലിശവും നിരുത്തരവാദപരവും മഹാരാഷ്ട്രയുടെ രാഷ്ട്രീയ സംസ്‌കാരത്തെ കളങ്കപ്പെടുത്തുന്നതുമാണെന്ന് ബിജെപി തിരിച്ചടിച്ചു.

 'ഹിന്ദു മതത്തിന്റെയും ഇന്ത്യയുടെയും സ്വത്വത്തെ വ്രണപ്പെടുത്തിയ ക്രൂരനും സ്വേച്ഛാധിപതിയുമായ ഭരണാധികാരിയായിരുന്നു ഔറംഗസേബ്. അത്തരമൊരു ഭരണാധികാരിയെ മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസിനെപ്പോലെ ജനാധിപത്യപരവും കഴിവുള്ളതുമായ നേതാവുമായി താരതമ്യം ചെയ്യുന്നത് സൂര്യന് നേര്‍ക്ക് തുപ്പാന്‍ ശ്രമിക്കുന്നതിന് തുല്യമാണെന്ന് ബിജെപി സംസ്ഥാന പ്രസിഡന്റ് ചന്ദ്രശേഖര്‍ ബവന്‍കുലെ പറഞ്ഞു.

'ഔറംഗസീബ് മതത്തിന്റെ പേരില്‍ ഹിന്ദുക്കളെ വേട്ടയാടി, ക്ഷേത്രങ്ങള്‍ നശിപ്പിച്ചു, നികുതി ചുമത്തി.' ദേവേന്ദ്ര ഫഡ്നാവിസ് നിയമത്തിന്റെ ചട്ടക്കൂടിനുള്ളില്‍ നിന്നാണ് സംസ്ഥാനത്തെ നയിച്ചത്, അദ്ദേഹത്തിന്റെ ഭരണകാലത്ത് ഹിന്ദുമതത്തിന് അഭിമാനത്തോടെ നിലകൊള്ളാന്‍ അവസരം ലഭിച്ചെന്നും അദ്ദേഹം പറഞ്ഞു.

ഔറംഗസേബിനെ മുഖ്യമന്ത്രി ഫഡ്നാവിസുമായി താരതമ്യം ചെയ്യുന്നതിലൂടെ കോണ്‍ഗ്രസ് മഹാരാഷ്ട്രയുടെ സ്വത്വത്തെ അപമാനിക്കുകയാണ്.

ഹര്‍ഷ് വര്‍ധന്‍ സപ്കലും കോണ്‍ഗ്രസും താഴ്ന്ന രാഷ്ട്രീയം സ്വീകരിച്ചു. അവരുടെ ഈ ബാലിശമായ മാനസികാവസ്ഥ കാരണം, ഇന്ന് കോണ്‍ഗ്രസ് അവരുടെ നിലനില്‍പ്പിനായി തന്നെ പോരാടുകയാണ്. 

ഇത്തരം പരിഹാസ്യമായ പ്രസ്താവനകള്‍ നടത്തി അദ്ദേഹം വാര്‍ത്തകളില്‍ നിറഞ്ഞു നില്‍ക്കാന്‍ ശ്രമിക്കുകയാണ്, പക്ഷേ മഹാരാഷ്ട്രയിലെ ജനങ്ങള്‍ ബുദ്ധിമാന്‍മാരാണ്. സപ്കലിനും കോണ്‍ഗ്രസിനും അവരുടെ സ്ഥാനം എവിടെയാണെന്ന് അവര്‍ കാണിച്ചുകൊടുക്കുമെന്നും ചന്ദ്രശേഖര്‍ ബവന്‍കുലെ പറഞ്ഞു.