ഇറാനെതിരായ ആക്രമണം തെറ്റ്; മൂന്നാം ലോകമഹായുദ്ധത്തിന് സാധ്യതയെന്ന് ഫാറൂഖ് അബ്ദുള്ള; ഇന്ത്യ നിലപാട് വ്യക്തമാക്കണമെന്ന് ആവശ്യം

ജമ്മു: പശ്ചിമേഷ്യയില്‍ ഇറാനെതിരെ അമേരിക്കയും ഇസ്രായേലും നടത്തുന്ന സൈനിക നീക്കങ്ങള്‍ക്കെതിരെ രൂക്ഷവിമര്‍ശനവുമായി നാഷണല്‍ കോണ്‍ഫറന്‍സ് അധ്യക്ഷന്‍ ഫാറൂഖ് അബ്ദുള്ള. മറ്റൊരു രാജ്യത്തിന്റെ പരമാധികാരത്തിന് മേല്‍ കടന്നുകയറാന്‍ ആര്‍ക്കും അവകാശമില്ലെന്നും, നിലവിലെ സാഹചര്യം ഒരു മൂന്നാം ലോകമഹായുദ്ധത്തിലേക്ക് നയിച്ചേക്കാമെന്നും അദ്ദേഹം മുന്നറിയിപ്പ് നല്‍കി.

ഇറാന്‍ ഒരു സ്വതന്ത്ര രാഷ്ട്രമാണെന്നും അവിടെ അമേരിക്ക നടത്തുന്ന ഇടപെടലുകള്‍ തെറ്റായ കീഴ്വഴക്കമാണെന്നും അദ്ദേഹം പറഞ്ഞു. വെനസ്വേലയിലും സമാനമായ അധിനിവേശ ശ്രമങ്ങളാണ് അമേരിക്ക നടത്തിയതെന്ന് അദ്ദേഹം ചൂണ്ടിക്കാട്ടി.

പശ്ചിമേഷ്യയിലെ സംഘര്‍ഷം കേവലം ആ പ്രദേശത്ത് ഒതുങ്ങിനില്‍ക്കില്ല. ലോകക്രമത്തെത്തുടര്‍ന്ന് ഇത് വലിയൊരു ആഗോള യുദ്ധമായി മാറാന്‍ സാധ്യതയുണ്ടെന്നും അതീവ ജാഗ്രതയോടെ വിഷയം കൈകാര്യം ചെയ്യണമെന്നും ഫാറൂഖ് അബ്ദുള്ള ആവശ്യപ്പെട്ടു.

ഈ നിര്‍ണ്ണായക ഘട്ടത്തില്‍ ഭാരത സര്‍ക്കാര്‍ തങ്ങളുടെ ഔദ്യോഗിക നിലപാട് ലോകത്തിന് മുന്നില്‍ വ്യക്തമാക്കണമെന്നും അദ്ദേഹം കൂട്ടിച്ചേര്‍ത്തു.

ഇറാന്റെ പരമോന്നത നേതാവ് ആയത്തുള്ള അലി ഖമേനിയുടെ വധത്തെത്തുടര്‍ന്ന് കശ്മീര്‍ താഴ്വരയിലും മുസ്ലിം ലോകത്തും വലിയ തോതിലുള്ള പ്രതിഷേധങ്ങള്‍ നടക്കുന്നുണ്ട്. ഈ വികാരം ഉള്‍ക്കൊള്ളുന്നുണ്ടെങ്കിലും പ്രതിഷേധങ്ങള്‍ സമാധാനപരമായിരിക്കണമെന്നും അക്രമാസക്തമാകരുതെന്നും അദ്ദേഹം പ്രവര്‍ത്തകരോട് അഭ്യര്‍ത്ഥിച്ചു.