ഭോലേനാഥ് നിങ്ങൾക്കായി ഇവിടെ കാത്തിരിക്കുന്നു. നമ്മുടെ സമ്പദ്‌വ്യവസ്ഥയ്ക്കായി ടൂറിസത്തെ ആശ്രയിക്കരുതെന്ന് ഫാറൂഖ് അബ്ദുള്ള

ശ്രീനഗര്‍: അമര്‍നാഥിലേക്കുള്ള വാര്‍ഷിക തീര്‍ത്ഥാടനത്തിനായി ഭക്തരെ ക്ഷണിച്ച് നാഷണല്‍ കോണ്‍ഫറന്‍സ് പ്രസിഡന്റും മുന്‍ ജമ്മു കശ്മീര്‍ മുഖ്യമന്ത്രിയുമായ ഡോ. ഫാറൂഖ് അബ്ദുള്ള. ഭോലേനാഥ് നിങ്ങള്‍ക്കായി ഇവിടെ കാത്തിരിക്കുന്നുവെന്ന് അദ്ദേഹം പറഞ്ഞു.

നമ്മുടെ സമ്പദ്വ്യവസ്ഥയ്ക്കായി ടൂറിസത്തെ ആശ്രയിക്കരുതെന്ന് അദ്ദേഹം തദ്ദേശവാസികളോട് പറഞ്ഞു. ഈ സംസ്ഥാനത്തെ മുന്നോട്ട് കൊണ്ടുപോകണമെങ്കില്‍, സാമ്പത്തികമായി നമ്മെ ശക്തരാക്കുന്ന സുസ്ഥിര ബിസിനസ്സ് മേഖലകളിലേക്ക് നാം നീങ്ങേണ്ടതുണ്ട്.

ബൈസരന്‍ താഴ്വരയിലെ ഭീകരാക്രമണവും തുടര്‍ന്നുണ്ടായ പാകിസ്ഥാന്‍ ഷെല്ലാക്രമണവും ജമ്മു കശ്മീരിലെ ടൂറിസത്തിനുണ്ടാക്കിയ നാശനഷ്ടങ്ങളെക്കുറിച്ച് പഹല്‍ഗാമില്‍ മാധ്യമപ്രവര്‍ത്തകരോട് സംസാരിക്കവെ അദ്ദേഹം ചൂണ്ടിക്കാട്ടി.

കശ്മീര്‍ ലോകത്തിലെ ഏറ്റവും മനോഹരമായ സ്ഥലമാണെന്ന് ഫാറൂഖ് അബ്ദുള്ള പറഞ്ഞു. ലോകമെമ്പാടുമുള്ള വിനോദസഞ്ചാരികള്‍ ഇവിടെ വരാന്‍ ആഗ്രഹിക്കുന്നു.

ഇവിടെ ടൂറിസത്തിന് വലിയ സാധ്യതകളുണ്ട്, പക്ഷേ ഇതിലെ പ്രശ്‌നം എവിടെയെങ്കിലും ഒരു വെടിയുണ്ട പൊട്ടിയാല്‍ ആളുകള്‍ ഓടിപ്പോകും എന്നതാണെന്നും അദ്ദേഹം പറഞ്ഞു.