/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2026/02/16/untitled-2026-02-16-15-41-30.jpg)
ഭിവാഡി: രാജസ്ഥാനിലെ അല്വാര് ജില്ലയിലുള്ള ഭിവാഡി ഖുഷ്ഖേദ വ്യവസായ മേഖലയെ നടുക്കി വന് തീപിടുത്തം. കെമിക്കല് ഫാക്ടറിയിലുണ്ടായ അപകടത്തില് എട്ട് തൊഴിലാളികള്ക്ക് ജീവന് നഷ്ടമായി. തിങ്കളാഴ്ച പുലര്ച്ചെയാണ് പ്ലോട്ട് നമ്പര് G1/118B-ല് പ്രവര്ത്തിക്കുന്ന ഫാക്ടറിയില് തീപിടുത്തമുണ്ടായത്.
ഫാക്ടറിയില് സൂക്ഷിച്ചിരുന്ന രാസവസ്തുക്കളിലേക്ക് തീ പടര്ന്നതോടെ നിമിഷങ്ങള്ക്കകം പ്രദേശം പുകയും അഗ്നിജ്വാലകളും കൊണ്ട് നിറഞ്ഞു. തീ അതിവേഗം പടര്ന്നതിനാല് ഫാക്ടറിക്കുള്ളിലുണ്ടായിരുന്ന തൊഴിലാളികള്ക്ക് പുറത്തിറങ്ങാന് കഴിഞ്ഞില്ല. അഗ്നിശമന സേന നടത്തിയ തിരച്ചിലിലാണ് മൃതദേഹങ്ങള് കണ്ടെടുത്തത്.
അപകടവിവരമറിഞ്ഞ് ഭിവാഡി, തിജാര എന്നിവിടങ്ങളില് നിന്നുള്ള നിരവധി ഫയര് എഞ്ചിനുകള് സ്ഥലത്തെത്തി. ഒന്നര മണിക്കൂര് നീണ്ട കഠിനമായ പരിശ്രമത്തിനൊടുവിലാണ് തീ നിയന്ത്രണവിധേയമാക്കാന് സാധിച്ചത്.
ഭിവാഡി എസ്പി, ഡിഎസ്പി ശിവരാജ് സിംഗ്, അഡീഷണല് ജില്ലാ കളക്ടര് സുമിത്ര മിശ്ര എന്നിവര് സ്ഥലത്തെത്തി രക്ഷാപ്രവര്ത്തനങ്ങള്ക്ക് നേതൃത്വം നല്കി. സമീപത്തെ ഫാക്ടറികളിലേക്ക് തീ പടരാതിരിക്കാന് മുന്കരുതല് നടപടികള് സ്വീകരിച്ചിട്ടുണ്ട്.
തീപിടുത്തത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. സംഭവത്തില് പോലീസ് അന്വേഷണം ആരംഭിച്ചു. മൃതദേഹങ്ങള് പോസ്റ്റ്മോര്ട്ടത്തിനായി ആശുപത്രിയിലേക്ക് മാറ്റി.