പഞ്ചാബിലെ വെള്ളപ്പൊക്കം: 50 ഏക്കര്‍ ഭൂമിയും മൂന്ന് വീടുകളും വിഴുങ്ങി സത്ലജ് നദി, വീടുകളുടെ ചുമരുകളിലും മേല്‍ക്കൂരകളിലും വിള്ളലുകള്‍. തറകളും താഴ്ന്നു

ഫിറോസ്പൂര്‍: സത്ലജ് നദിയാല്‍ ചുറ്റപ്പെട്ട തെണ്ടിവാല ഗ്രാമത്തിലെ ജനങ്ങള്‍ കഴിഞ്ഞ പത്ത് ദിവസമായി വെള്ളത്തിനിടയില്‍ ജീവനുവേണ്ടി പോരാടുകയാണ്.

3.30 ലക്ഷം ക്യുസെക്സ് ജലനിരപ്പോടെ ഒഴുകുന്ന നദി വലിയ വേദനയാണ് സൃഷ്ടിച്ചിരിക്കുന്നത്. ഗ്രാമത്തിലെ ഏകദേശം 50 ഏക്കര്‍ ഭൂമിയും മൂന്ന് വീടുകളും നദി വിഴുങ്ങിക്കഴിഞ്ഞു.

ഗ്രാമത്തില്‍ ആകെ 255 വീടുകളുണ്ട്. പത്ത് ദിവസം മുമ്പ്, സത്ലജ് നദിയിലെ ജലനിരപ്പ് ഉയര്‍ന്നു. സുരക്ഷയ്ക്കായി ആളുകള്‍ സ്ത്രീകളെയും കുട്ടികളെയും വീടുകളില്‍ നിന്ന് ദുരിതാശ്വാസ ക്യാമ്പുകളിലേക്ക് അയച്ചു. ചിലര്‍ അവരെ ബന്ധുവീടുകളിലേക്ക് അയച്ചു.

ഗ്രാമത്തിലെ ചിലര്‍ വീടുകള്‍ സംരക്ഷിക്കാന്‍ അവിടെ തന്നെ തങ്ങി. വെള്ളപ്പൊക്കത്തില്‍ മൂന്ന് വീടുകള്‍ നദിയില്‍ ഒലിച്ചുപോയി. 10 വീടുകള്‍ക്ക് സാരമായ കേടുപാടുകള്‍ സംഭവിച്ചു. പല വീടുകളിലും വിള്ളലുകള്‍ ഉണ്ടായിട്ടുണ്ട്.

ശക്തമായ ഒഴുക്ക് കാരണം ഗ്രാമങ്ങളിലേക്കുള്ള പ്രധാന റോഡ് മൂന്ന് സ്ഥലങ്ങളില്‍ തകര്‍ന്നിട്ടുണ്ട്. അത്തരമൊരു സാഹചര്യത്തില്‍, വാഹനങ്ങള്‍ക്ക് ഗ്രാമത്തിലെത്താന്‍ വളരെ ബുദ്ധിമുട്ടാണ്.

റോഡിന്റെ വശങ്ങളില്‍ പലയിടത്തുനിന്നും മണ്ണ് ഇളകിപ്പോയിട്ടുണ്ട്. ഒരു വെള്ളച്ചാട്ടം പോലെയാണ് സത്ജലിലെ വെള്ളം ഇവിടെ ഒഴുകുന്നത്.

വീടുകളില്‍ രണ്ടര മുതല്‍ മൂന്ന് അടി വരെ വെള്ളം നിറഞ്ഞിരിക്കുന്നു. വെള്ളം കെട്ടിക്കിടക്കുന്നതിനാല്‍ പല വീടുകളുടെയും ചുമരുകളിലും മേല്‍ക്കൂരകളിലും വിള്ളലുകള്‍ ഉണ്ടായിട്ടുണ്ട്. തറകളും താഴ്ന്നു.