ഡെറാഡൂണിൽ മരണസംഖ്യ ഉയരുന്നു; 14 പേരെ ഇനിയും കാണാനില്ല

ഡെറാഡൂണ്‍:  ഡെറാഡൂണിലെ നദികളിലെ വെള്ളപ്പൊക്കത്തിലും മണ്ണിടിച്ചിലിലും മരിച്ചവരുടെ എണ്ണം 21 ആയി ഉയര്‍ന്നു. പതിനാല് പേരെ ഇപ്പോഴും കാണാനില്ല. മുസ്സൂറി, സഹസ്രധാര, വികാസ്‌നഗര്‍ പ്രദേശങ്ങളില്‍ തലസ്ഥാനവുമായുള്ള നേരിട്ടുള്ള ബന്ധം വിച്ഛേദിക്കപ്പെട്ടു.

റായ്പൂര്‍ മേഖലയിലെ സൗദ സരോലിയിലും ഗുലാര്‍ഘട്ടിയിലും സോങ് നദിയില്‍ ഒഴുക്കില്‍പ്പെട്ട രണ്ട് പേരുടെ മൃതദേഹങ്ങള്‍ കണ്ടെടുത്തു.

അസാന്‍ നദിയില്‍ നിന്നാണ് ഒരാളുടെ മൃതദേഹം കണ്ടെത്തിയത്. ഡെറാഡൂണിലും നൈനിറ്റാളിലും ബുധനാഴ്ച കനത്ത മഴ പെയ്യുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. ഇതിനായി യെല്ലോ അലര്‍ട്ട് പ്രഖ്യാപിച്ചിട്ടുണ്ട്.

ഡെറാഡൂണിലെ കനത്ത മഴയില്‍ കുടിവെള്ള ലൈനുകള്‍ തകര്‍ന്നു, ഇത് രണ്ട് ലക്ഷത്തിലധികം ആളുകള്‍ക്ക് കുടിവെള്ള പ്രതിസന്ധി സൃഷ്ടിച്ചു. ജനങ്ങള്‍ വെള്ളത്തിനായി പാടുപെടുകയാണ്. ചൊവ്വാഴ്ച, ദുരിതബാധിത കുടുംബങ്ങള്‍ക്ക് വെള്ളം എത്തിക്കാന്‍ ടാങ്കറുകള്‍ അയച്ചു. 

ഡെറാഡൂണില്‍ വൈദ്യുതി, വെള്ളം, ജനങ്ങളുടെ സ്ഥാവര ജംഗമ വസ്തുക്കള്‍ എന്നിവയ്ക്ക് സാരമായ കേടുപാടുകള്‍ സംഭവിച്ചു. ആറ് മണിക്കൂര്‍ നീണ്ടുനിന്ന മഴയില്‍ 100 കോടിയിലധികം രൂപയുടെ നാശനഷ്ടമുണ്ടായി.