വടക്കേ ഇന്ത്യ കൊടും തണുപ്പില്‍ വിറയ്ക്കുമെന്ന് കാലാവസ്ഥാ റിപ്പോര്‍ട്ട്: ഡിസംബര്‍ 28 വരെ ഇടതൂര്‍ന്ന മൂടല്‍മഞ്ഞ് തുടരും

ഡല്‍ഹി: ഡല്‍ഹി ഉള്‍പ്പെടെ ഉത്തരേന്ത്യയില്‍ ഉടനീളം കടുത്ത തണുപ്പ് തുടരുന്നു. രാവിലെ പല സംസ്ഥാനങ്ങളിലും ഇടതൂര്‍ന്ന മൂടല്‍മഞ്ഞ് അനുഭവപ്പെടുന്നു. പല പ്രദേശങ്ങളിലും താപനില കുത്തനെ കുറഞ്ഞു.

ഹരിയാന, പഞ്ചാബ്, ഉത്തര്‍പ്രദേശ് തുടങ്ങിയ സംസ്ഥാനങ്ങളിലെ താപനില 5°C നും 10°C നും ഇടയില്‍ കുറഞ്ഞതായി ഇന്ത്യന്‍ കാലാവസ്ഥാ വകുപ്പ് അറിയിച്ചു. അടുത്ത 24 മണിക്കൂറിനുള്ളില്‍ മലയോര മേഖലകളില്‍ നേരിയ മഴയ്ക്കും മഞ്ഞുവീഴ്ചയ്ക്കും സാധ്യതയുണ്ട്.

ഡിസംബര്‍ 28 വരെ ഉത്തര്‍പ്രദേശ്, ബിഹാര്‍, പഞ്ചാബ്, ഹരിയാന, ചണ്ഡീഗഡ്, രാജസ്ഥാന്‍, വടക്കന്‍ ഛത്തീസ്ഗഢ്, ജാര്‍ഖണ്ഡ്, ഒഡീഷ, വടക്കന്‍ മധ്യപ്രദേശ്, വടക്കുകിഴക്കന്‍ ഇന്ത്യയുടെ ചില ഭാഗങ്ങള്‍ എന്നിവിടങ്ങളില്‍ കടുത്ത തണുപ്പ് അനുഭവപ്പെടാന്‍ സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. ഈ പ്രദേശങ്ങളില്‍ രാവിലെ സമയങ്ങളില്‍ ഇടതൂര്‍ന്ന മൂടല്‍മഞ്ഞ് നിലനില്‍ക്കുമെന്ന് പ്രതീക്ഷിക്കുന്നു.

ജമ്മു കശ്മീര്‍, ലഡാക്ക് എന്നിവിടങ്ങളില്‍ താപനില പൂജ്യത്തിന് താഴെയായി. ഉത്തരാഖണ്ഡ്, ഹിമാചല്‍ പ്രദേശ് എന്നിവിടങ്ങളിലും മഞ്ഞുവീഴ്ച തുടരുകയാണ്.

പഞ്ചാബ്, ഉത്തര്‍പ്രദേശ്, ഹരിയാന, കിഴക്കന്‍ രാജസ്ഥാന്‍, വടക്കുകിഴക്കന്‍ ഇന്ത്യ, ജാര്‍ഖണ്ഡ്, ഛത്തീസ്ഗഢ്, ബീഹാര്‍, സിക്കിം, മധ്യ മഹാരാഷ്ട്ര എന്നിവിടങ്ങളിലെ ചില സ്ഥലങ്ങളില്‍ കുറഞ്ഞ താപനില 5°C നും 10°C നും ഇടയില്‍ കുറഞ്ഞു. സമതലങ്ങളില്‍, ഉത്തര്‍പ്രദേശിലെ ബരാബങ്കിയില്‍ 4.5°C എന്ന ഏറ്റവും കുറഞ്ഞ താപനില രേഖപ്പെടുത്തി.