വ്യാജ ബലാത്സംഗ കേസില്‍ കുടുക്കുമെന്ന് ഭീഷണിപ്പെടുത്തി അഭിഭാഷകനിൽ നിന്ന് 40 ലക്ഷം രൂപ തട്ടാൻ ശ്രമം: യുവതിയും സുഹൃത്തും പിടിയിൽ

ഡല്‍ഹി: രാജസ്ഥാനിലെ ബാര്‍മര്‍ ജില്ലയിലെ ഒരു അഭിഭാഷകനില്‍ നിന്ന് അശ്ലീല വീഡിയോ പകര്‍ത്തി 40 ലക്ഷം രൂപ ആവശ്യപ്പെട്ട് ബ്ലാക്ക് മെയില്‍ ചെയ്തതായി പരാതി. 

വ്യാജ ബലാത്സംഗ കേസില്‍ കുടുക്കുമെന്ന് പ്രതി ഭീഷണിപ്പെടുത്തി. ഇരയുടെ പരാതിയെ തുടര്‍ന്ന് ശനിയാഴ്ചയാണ് പ്രതിയായ സ്ത്രീയെയും കൂട്ടാളിയെയും അറസ്റ്റ് ചെയ്തത്.

പ്രിയങ്ക എന്ന പ്രതി തന്നെ ഒരു കെണിയില്‍ വീഴ്ത്തി അശ്ലീല വീഡിയോ റെക്കോര്‍ഡ് ചെയ്തെന്നും പിന്നീട് ഇത് ഉപയോഗിച്ച് ബ്ലാക്ക്മെയില്‍ ചെയ്തെന്നും അഭിഭാഷകന്‍ പരാതിയില്‍ ആരോപിച്ചു. 

40 ലക്ഷം രൂപ നല്‍കിയില്ലെങ്കില്‍ വീഡിയോ വൈറലാക്കുമെന്നും ബലാത്സംഗ കേസില്‍ തന്നെ വ്യാജമായി കുടുക്കുമെന്നും അവര്‍ ഭീഷണിപ്പെടുത്തിയതായി പരാതിയില്‍ പറയുന്നു.

ബാർമർ നിവാസിയായ കമൽ സിങ്ങിന് പണം കൈമാറാൻ സ്ത്രീ തന്നോട് ആവശ്യപ്പെട്ടതായും പരാതിക്കാരൻ ആരോപിച്ചു. ഭയം കാരണം അഭിഭാഷകൻ പ്രതിക്ക് 50,000 രൂപ നൽകി. പരാതിയെ തുടർന്ന് പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.

പ്രിയങ്ക പശ്ചിമ ബംഗാൾ സ്വദേശിയാണെന്നും നിലവിൽ ഡൽഹിയിലാണ് താമസിക്കുന്നതെന്നും പോലീസ് പറഞ്ഞു. പ്രിയങ്കയും കമൽ സിങ്ങും അഭിഭാഷകനെ വ്യാജ കുറ്റങ്ങൾ ചുമത്തി ഭീഷണിപ്പെടുത്തുകയും 40 ലക്ഷം രൂപ ആവശ്യപ്പെടുകയും ചെയ്തതായി ഉദ്യോഗസ്ഥർ സ്ഥിരീകരിച്ചു.