ഒഡീഷയില്‍ കൊല്ലപ്പെട്ട പ്രമുഖ മാവോയിസ്റ്റ് നേതാവ് ഗണേഷ് ഉയികെ ഉള്‍പ്പെടെ ആറു പേരുടെ തലക്ക് പ്രഖ്യാപിച്ചിരുന്നത് 1.1 കോടി രൂപ പാരിതോഷികം

ഭുവനേശ്വര്‍: ഒഡീഷയിലെ കാണ്ഡമാല്‍ ജില്ലയില്‍ നടന്ന രണ്ട് വ്യത്യസ്ത ഏറ്റുമുട്ടലുകളിലായി മാവോയിസ്റ്റ് കമാന്‍ഡര്‍ ഗണേഷ് ഉയികെ ഉള്‍പ്പെടെ ആറ് നക്‌സലൈറ്റുകളെ സുരക്ഷാ സേന വധിച്ചതായി ഉദ്യോഗസ്ഥര്‍ പറഞ്ഞു. ബെല്‍ഘര്‍ പോലീസ് സ്റ്റേഷന്‍ പരിധിയിലുള്ള ഗുമ്മ വനത്തിലാണ് ബുധനാഴ്ച രാത്രി ആദ്യ ഏറ്റുമുട്ടല്‍ നടന്നത്, അതില്‍ രണ്ട് മാവോയിസ്റ്റുകളെ വധിച്ചു.

വ്യാഴാഴ്ച രാവിലെ ചക്കപ്പാട് പോലീസ് സ്റ്റേഷന്‍ പരിധിയിലെ ഒരു വനത്തില്‍ നടന്ന രണ്ടാമത്തെ ഏറ്റുമുട്ടലില്‍ ഉയികെ ഉള്‍പ്പെടെ നാല് നക്‌സലൈറ്റുകളെ വധിച്ചു. പോലീസ് പറയുന്നതനുസരിച്ച്, ഉയികെ സിപിഐ (മാവോയിസ്റ്റ്) കേന്ദ്ര കമ്മിറ്റി അംഗമായിരുന്നുവെന്നും അദ്ദേഹത്തിന്റെ തലയ്ക്ക് 1.1 കോടി രൂപ ഇനാം പ്രഖ്യാപിച്ചിരുന്നുവെന്നും പറയുന്നു.

69 കാരനായ ഉയികെ പക്ക ഹനുമന്തു, രാജേഷ് തിവാരി, ചമ്രു, രൂപ എന്നീ അപരനാമങ്ങളില്‍ അറിയപ്പെട്ടിരുന്നതായി ഉദ്യോഗസ്ഥര്‍ പറഞ്ഞു.

തെലങ്കാനയിലെ നല്‍ഗൊണ്ട ജില്ലയിലെ പുല്ലേമല ഗ്രാമത്തില്‍ നിന്നുള്ളയാളാണ് ഇയാള്‍ എന്ന് ഉദ്യോഗസ്ഥര്‍ പറഞ്ഞു. ഏറ്റുമുട്ടല്‍ സ്ഥലങ്ങളില്‍ നിന്ന് രണ്ട് ഇന്‍സാസ് റൈഫിളുകളും ഒരു .303 റൈഫിളും ഉള്‍പ്പെടെയുള്ള ആയുധങ്ങളും വെടിക്കോപ്പുകളും ഉദ്യോഗസ്ഥര്‍ കണ്ടെടുത്തതായും അവര്‍ കൂട്ടിച്ചേര്‍ത്തു.

എന്നാല്‍ ഏറ്റുമുട്ടലില്‍ നിര്‍വീര്യമാക്കിയ മറ്റ് നക്‌സലൈറ്റുകളെ പോലീസ് ഇതുവരെ തിരിച്ചറിഞ്ഞിട്ടില്ല.

'ബുധനാഴ്ച രണ്ട് മാവോയിസ്റ്റുകളെ വെടിവച്ചു കൊന്നു. ഇന്ന് രാവിലെ നാല് പേരെ നിര്‍വീര്യമാക്കി. ഒരു കേന്ദ്ര കമ്മിറ്റി അംഗത്തിന്റെ കൊലപാതകം ഒഡീഷ പോലീസിന് വലിയ വിജയമാണ്. സംസ്ഥാനത്തെ മാവോയിസ്റ്റുകളുടെ നട്ടെല്ല് ഇത് തകര്‍ത്തു,' ഒഡീഷ ഡയറക്ടര്‍ ജനറല്‍ ഓഫ് പോലീസ് (ഡിജിപി) യോഗേഷ് ബഹാദൂര്‍ ഖുറാനിയ ഒരു പത്രസമ്മേളനത്തില്‍ പറഞ്ഞു.