/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2026/02/12/gen-naravane-2026-02-12-08-42-31.jpg)
ഡല്ഹി: മുന് കരസേനാ മേധാവി ജനറല് എം.എം. നരവനെയുടെ 'ഫോര് സ്റ്റാര്സ് ഓഫ് ഡെസ്റ്റിനി' എന്ന ആത്മകഥ ഔദ്യോഗിക അനുമതി ലഭിക്കുന്നതിന് മുന്പ് ആഗോള വിപണിയില് എത്തിയ സംഭവത്തില് ഡല്ഹി പോലീസ് അന്വേഷണം ഊര്ജിതമാക്കി.
പ്രതിരോധ മന്ത്രാലയത്തിന്റെ നിര്ബന്ധിത ക്ലിയറന്സ് ലഭിക്കുന്നതിന് മുന്പ് തന്നെ പുസ്തകം വിദേശ ഡിജിറ്റല് പ്ലാറ്റ്ഫോമുകളില് ലഭ്യമായത് അതീവ ഗൗരവത്തോടെയാണ് അധികൃതര് കാണുന്നത്.
ഇതൊരു സാധാരണ പകര്പ്പവകാശ ലംഘനമല്ലെന്നും, മറിച്ച് കൃത്യമായി ആസൂത്രണം ചെയ്ത നീക്കമാണെന്നും പോലീസ് സംശയിക്കുന്നു. അമേരിക്ക, കാനഡ, ജര്മ്മനി, ഓസ്ട്രേലിയ എന്നീ രാജ്യങ്ങളിലെ ഓണ്ലൈന് വിപണികളിലാണ് പുസ്തകം ആദ്യം പ്രത്യക്ഷപ്പെട്ടത്.
ചോര്ന്ന പതിപ്പുകളില് 13 അക്ക ഐ.എസ്.ബി.എന് നമ്പറുകള് രേഖപ്പെടുത്തിയിട്ടുണ്ട്. പുസ്തകം പ്രസിദ്ധീകരണത്തിന് പൂര്ണ്ണമായും സജ്ജമായ ശേഷമാണ് ചോര്ന്നതെന്നാണ് ഇത് സൂചിപ്പിക്കുന്നത്. പ്രസാധകരായ പെന്ഗ്വിന് ഇന്ത്യയോട് ഇക്കാര്യത്തില് വിശദീകരണം തേടിയിട്ടുണ്ട്.
ബ്രിട്ടീഷ് ഇന്ത്യന് ഓഷ്യന് ടെറിട്ടറിയുടെ ഡൊമെയ്ന് ആയ '.io' ഉപയോഗിക്കുന്ന ഒരു വെബ്സൈറ്റിലാണ് പുസ്തകം ആദ്യം അപ്ലോഡ് ചെയ്തതെന്ന് കണ്ടെത്തിയിട്ടുണ്ട്. ഇതിന്റെ സാമ്പത്തിക ഇടപാടുകളും ഡിജിറ്റല് ഉറവിടങ്ങളും പോലീസ് പരിശോധിച്ചു വരികയാണ്.
പാര്ലമെന്റില് കോണ്ഗ്രസ് നേതാവ് രാഹുല് ഗാന്ധി പുസ്തകത്തിലെ ഭാഗങ്ങള് ഉദ്ധരിച്ചതോടെയാണ് ഈ വിഷയം രാഷ്ട്രീയ വിവാദമായത്. ഔദ്യോഗികമായി പ്രസിദ്ധീകരിക്കാത്ത ഒരു പുസ്തകം എങ്ങനെ രാഹുല് ഗാന്ധിക്ക് ലഭിച്ചു എന്ന ചോദ്യം ഉയര്ന്നതോടെയാണ് ഡല്ഹി പോലീസ് ക്രിമിനല് ഗൂഢാലോചന കുറ്റം ചുമത്തി എഫ്.ഐ.ആര് രജിസ്റ്റര് ചെയ്തത്.
തങ്ങള് പുസ്തകം ഇതുവരെ പ്രസിദ്ധീകരിച്ചിട്ടില്ലെന്നും ഔദ്യോഗിക കോപ്പികള് പുറത്തിറക്കിയിട്ടില്ലെന്നുമാണ് പെന്ഗ്വിന് ഇന്ത്യയുടെ നിലപാട്. വിദേശ വെബ്സൈറ്റുകളില് ലിസ്റ്റ് ചെയ്തിരിക്കുന്ന പുസ്തകങ്ങളുടെ ഐ.എസ്.ബി.എന് നമ്പറുകള് പെന്ഗ്വിന് ഇന്ത്യയുടെ എഡിഷനുമായി ഒത്തുപോകുന്നത് അന്വേഷണത്തില് നിര്ണ്ണായകമാകും.
'പ്രതിരോധ രഹസ്യങ്ങളുമായി ബന്ധപ്പെട്ട പുസ്തകം ഔദ്യോഗിക അനുമതിയില്ലാതെ വിദേശ വിപണികളില് എത്തിച്ചതിന് പിന്നില് പ്രവര്ത്തിച്ചവരെ കണ്ടെത്താനാണ് ഇപ്പോള് ശ്രമിക്കുന്നത്.' - അന്വേഷണ ഉദ്യോഗസ്ഥര് വ്യക്തമാക്കി.