ഹിൻഡൻബർഗിലെ പ്രധാന നിക്ഷേപകന്‍ ജോർജ്ജ് സോറോസാണെന്ന് ബിജെപി; കോണ്‍ഗ്രസിനെതിരെ ആഞ്ഞടിച്ച്‌ രവിശങ്കർ പ്രസാദ്‌

ന്യൂഡല്‍ഹി: ഹിൻഡൻബർഗ് റിസർച്ചിലെ പ്രധാന നിക്ഷേപകൻ ഹംഗേറിയൻ വംശജനായ യുഎസ് നിക്ഷേപകൻ ജോർജ്ജ് സോറോസാണെന്ന് ബിജെപി. 

“ഇന്ന് ഞങ്ങൾ ചില പ്രശ്നങ്ങൾ ഉന്നയിക്കാൻ ആഗ്രഹിക്കുന്നു. ഹിൻഡൻബർഗിൽ ആരുടെ നിക്ഷേപമാണ് ഉള്ളത് ? ഇന്ത്യയ്‌ക്കെതിരെ നിരന്തരം കുപ്രചരണങ്ങൾ നടത്തുന്ന ഈ മാന്യനായ ജോർജ്ജ് സോറോസിനെ നിങ്ങൾക്കറിയാമോ ? അദ്ദേഹമാണ് അവിടത്തെ പ്രധാന നിക്ഷേപകൻ. നരേന്ദ്രമോദിയോടുള്ള വിദ്വേഷത്തിൽ, കോൺഗ്രസ് ഇന്ന് ഇന്ത്യയോട് തന്നെ വിദ്വേഷം വളർത്തിയെടുത്തിരിക്കുന്നു”-ബിജെപി എംപി രവിശങ്കർ പ്രസാദിനെ ഉദ്ധരിച്ച് എഎൻഐ റിപ്പോർട്ട് ചെയ്തു.

ഇന്ത്യയുടെ ഓഹരി വിപണി അസ്വസ്ഥമായാൽ ചെറുകിട നിക്ഷേപകർക്ക് ബുദ്ധിമുട്ടുണ്ടാകുമോ ഇല്ലയോ ? ഓഹരി വിപണി മുഴുവൻ തകർക്കാനും ചെറുകിട നിക്ഷേപകരുടെ മൂലധന നിക്ഷേപം നിർത്താനും ഇന്ത്യയിൽ സാമ്പത്തിക നിക്ഷേപം ഉണ്ടാകില്ലെന്ന് ഉറപ്പാക്കാനും കോണ്‍ഗ്രസ് ആഗ്രഹിക്കുന്നുവെന്നും രവിശങ്കർ പ്രസാദ്‌ ആരോപിച്ചു.

പ്രധാനമന്ത്രി നരേന്ദ്ര മോദിയുടെയും ഓപ്പൺ സൊസൈറ്റി ഫൗണ്ടേഷൻ്റെ സ്ഥാപകൻ്റെയും കടുത്ത വിമർശകനാണ് സോറോസ്. ഇന്ത്യയുടെ ജനാധിപത്യ പ്രക്രിയയിൽ ഇടപെടാന്‍ അദ്ദേഹം ശ്രമിക്കുന്നുവെന്നും ബിജെപി ആരോപിച്ചു.