ബൈക്ക് യാത്രികന്‍ അപകടത്തില്‍ മരിച്ചുവെന്ന് വ്യാജവാര്‍ത്ത. ബിഹാറിലെ ഗോപാൽഗഞ്ചിൽ അക്രമം പൊട്ടിപ്പുറപ്പെട്ടു, പോലീസ് വാഹനം കത്തിച്ചു; നിരവധി പേർ അറസ്റ്റിൽ

ഗോപാല്‍ഗഞ്ച്: ബീഹാറിലെ ഗോപാല്‍ഗഞ്ചില്‍ ബൈക്ക് യാത്രികന്‍ അപകടത്തില്‍ മരിച്ചുവെന്ന വ്യാജവാര്‍ത്തയെ തുടര്‍ന്ന് അക്രമം പൊട്ടിപ്പുറപ്പെട്ടതായി ഉദ്യോഗസ്ഥര്‍ പറഞ്ഞു, അതേസമയം ജനക്കൂട്ടം ഒരു പോലീസ് വാഹനത്തിനും തീയിട്ടു. 

ജനക്കൂട്ടത്തെ പിരിച്ചുവിടാന്‍ പോലീസ് കണ്ണീര്‍ വാതക ഷെല്ലുകള്‍ പ്രയോഗിക്കുകയും അധിക ഉദ്യോഗസ്ഥരെ വിന്യസിക്കുകയും ചെയ്തതിനെത്തുടര്‍ന്ന് സ്ഥിതി നിയന്ത്രണവിധേയമാണ്.

നവംബര്‍ ആറിന് നടന്ന നിയമസഭാ തെരഞ്ഞെടുപ്പിന്റെ ആദ്യ ഘട്ടത്തിലാണ് ഗോപാല്‍ഗഞ്ചില്‍ വോട്ടെടുപ്പ് നടന്നതെങ്കിലും, ബീഹാറില്‍ നിയമസഭാ തെരഞ്ഞെടുപ്പ് നടക്കുന്നതിനിടെയാണ് അക്രമം ഉണ്ടായത്.

ബൈക്കില്‍ പോവുകയായിരുന്ന മൂന്ന് ആണ്‍കുട്ടികള്‍ പെട്ടെന്ന് മുന്നില്‍ വന്ന ഒരു കാര്‍ ഒഴിവാക്കാന്‍ ശ്രമിക്കുന്നതിനിടെ അപകടത്തില്‍പ്പെട്ടതിനെ തുടര്‍ന്നാണ് അക്രമം പൊട്ടിപ്പുറപ്പെട്ടതെന്ന് ഗോപാല്‍ഗഞ്ച് പോലീസ് സൂപ്രണ്ട് (എസ്പി) അവ്‌ധേഷ് ദീക്ഷിത് മാധ്യമപ്രവര്‍ത്തകരോട് പറഞ്ഞു. സംഭവത്തില്‍ പരിക്കേറ്റ മൂന്ന് പേരെയും ചികിത്സയ്ക്കായി പ്രാദേശിക ആശുപത്രിയിലേക്ക് മാറ്റി.

നന്ദ് കുമാര്‍ ചൗഹാന്‍, എഹ്‌സാന്‍ അലി, രാജ ഹുസൈന്‍ എന്നിവരാണ് പരിക്കേറ്റവര്‍. ഗോപാല്‍ഗഞ്ചിലെ സരേയ പ്രദേശത്തെ താമസക്കാരാണ് മൂവരും എന്ന് ഒരു മാധ്യമ റിപ്പോര്‍ട്ട് പറയുന്നു.

'മുന്നില്‍ നിന്ന് ഒരു സ്‌കോര്‍പിയോ അമിതവേഗതയില്‍ വന്നു. സ്‌കോര്‍പിയോ ഒഴിവാക്കാന്‍ ശ്രമിക്കുന്നതിനിടെ ബൈക്ക് യാത്രികര്‍ അപകടത്തില്‍പ്പെട്ടു. അവര്‍ക്ക് പരിക്കേറ്റു, ചികിത്സയ്ക്കായി ആശുപത്രിയില്‍ പ്രവേശിപ്പിച്ചു,' ദീക്ഷിതിനെ ഉദ്ധരിച്ച് വാര്‍ത്താ ഏജന്‍സിയായ എഎന്‍ഐ റിപ്പോര്‍ട്ട് ചെയ്തു.