ഗുജറാത്തിൽ കള്ളനോട്ടിൽ ഗാന്ധിജിക്ക് പകരം തന്‍റെ ഫോട്ടോ; പ്രതികരണവുമായി ബോളിവുഡ് നടൻ അനുപം ഖേർ

ന്യൂഡൽഹി: 'ഇവിടെ എന്തും സംഭവിക്കാം. ഗുജറാത്തിൽ ഗാന്ധിജിക്ക് പകരം തന്‍റെ ഫോട്ടോ പതിച്ച കള്ളനോട്ടുകൾ പിടിച്ചെടുത്ത സംഭവത്തിൽ പ്രതികരണവുമായി ബോളിവുഡ് നടൻ അനുപം ഖേർ.  

ഗാന്ധിജിയുടെ ചിത്രത്തിന്‍റെ സ്ഥാനത്ത് അനുപം ഖേറിന്‍റെ ഫോട്ടോ അച്ചടിച്ച 1.6 കോടി മൂല്യം വരുന്ന 500 രൂപയുടെ കള്ളനോട്ടുകളാണ് അഹമ്മദാബാദ് പൊലീസ് പിടികൂടിയത്. Reserve Bank of India എന്നതിന് പകരം 'Resole Bank of India' എന്നാണ് കള്ളനോട്ടിൽ തെറ്റായി രേഖപ്പെടുത്തിയിട്ടുള്ളത്.

 ഞെട്ടലുണ്ടാക്കുന്നതിനപ്പുറം കൗതുകകരം കൂടിയാണ് നടന്‍റെ ഫോട്ടോ വെച്ച് അടിച്ച കള്ളനോട്ടുകളെന്ന് പലരും അഭിപ്രായപ്പെടുന്നു. അഹമ്മദാബാദിലെ സ്വർണക്കട്ടി വ്യവസായിയായ മെഹുൽ താക്കറിന് രണ്ട് പേർ കൈമാറിയതാണ് ഈ കള്ളനോട്ടുകൾ. 2100 ഗ്രാം സ്വർണത്തിന് പകരമായി 1.6 കോടി രൂപ നൽകാമെന്ന് പ്രതികൾ വാഗ്ദാനം ചെയ്തിരുന്നു. തുടർന്നാണ് പണം കൈമാറിയത്.

പിന്നീട് പരിശോധിച്ചപ്പോഴാണ് ഗാന്ധിജിക്ക് പകരം അനുപം ഖേറും റിസർവ് ബാങ്കിന് പകരം റിസോ ബാങ്കുമാണ് നോട്ടിലുള്ളത് എന്ന് കണ്ടത്. തുടർന്ന് പൊലീസിൽ പരാതിപ്പെടുകയായിരുന്നു. സംഭവത്തിൽ പ്രതികൾക്കായി പൊലീസ് അന്വേഷണം തുടങ്ങി.