ഹിസ്ബുള്ള നേതാവ് ഹസന്‍ നസ്റല്ലയുടെ കൊലപാതകത്തില്‍ കാശ്മീരിലും പ്രതിഷേധം: തിരഞ്ഞെടുപ്പ് പ്രചാരണം അവസാനിപ്പിച്ച് മെഹബൂബ മുഫ്തിയും സയ്യിദ് റുഹുല്ല മെഹ്ദിയും

ശ്രീനഗര്‍:  ലെബനനില്‍ ഇസ്രായേല്‍ നടത്തിയ വ്യോമാക്രമണത്തില്‍ ഹിസ്ബുല്ല മേധാവി ഹസന്‍ നസ്റല്ല കൊല്ലപ്പെട്ടതിനെ തുടര്‍ന്ന് കശ്മീരിലും വന്‍ പ്രതിഷേധം.

ഹിസ്ബുല്ല നേതാവിന്റെ കൊലപാതകത്തില്‍ അനുശോചനം രേഖപ്പെടുത്തി മുന്‍ മുഖ്യമന്ത്രിയും പീപ്പിള്‍സ് ഡെമോക്രാറ്റിക് പാര്‍ട്ടിയുടെ പ്രസിഡന്റുമായ മെഹബൂബ മുഫ്തിയും മുതിര്‍ന്ന നാഷണല്‍ കോണ്‍ഫറന്‍സ് നേതാവ് ആഗ സയ്യിദ് റുഹുല്ല മെഹ്ദിയും തിരഞ്ഞെടുപ്പ് പ്രചാരണം അവസാനിപ്പിച്ചു.

ശനിയാഴ്ച ഉച്ചകഴിഞ്ഞ് നസ്റല്ലയുടെ മരണം ഹിസ്ബുള്ള സ്ഥിരീകരിച്ചതോടെ ശ്രീനഗറിന്റെയും ബുദ്ഗാം ജില്ലയുടെയും വിവിധ ഭാഗങ്ങളില്‍ ആയിരക്കണക്കിന് ആളുകള്‍ തെരുവിലിറങ്ങി.  

ഇസ്രായേല്‍ വിരുദ്ധ, അമേരിക്കന്‍ വിരുദ്ധ മുദ്രാവാക്യങ്ങള്‍ ഉയര്‍ത്തി പ്രതിഷേധക്കാര്‍ നസ്‌റല്ലയുടെ ചിത്രങ്ങളും പിടിച്ചാണ് തെരുവിലിറങ്ങിയത്.

മൂന്ന് പതിറ്റാണ്ടിലേറെക്കാലം ഹിസ്ബുള്ളയെ നയിച്ച നസ്റല്ല ലോകമെമ്പാടുമുള്ള ഷിയാ സമൂഹത്തിനിടയില്‍ ആദരണീയനായ വ്യക്തിയാണ്. കശ്മീരിലെ ഷിയാ സമൂഹം അദ്ദേഹത്തെ പ്രതിരോധത്തിന്റെ പ്രതീകമായാണ് കാണുന്നത്.