മഹാരാഷ്ട്ര കോൺഗ്രസ് വൈസ് പ്രസിഡന്റ് അകോളയിലെ പള്ളിയിൽ കുത്തേറ്റ് മരിച്ചു, പ്രതി അറസ്റ്റിൽ

മുംബൈ: അകോല ജില്ലയിലെ ഒരു പള്ളിയില്‍ കുത്തേറ്റ മഹാരാഷ്ട്ര കോണ്‍ഗ്രസ് വൈസ് പ്രസിഡന്റ് ഹിദായത്തുള്ള പട്ടേല്‍ ചികിത്സയിലിരിക്കെ മരിച്ചു. ചൊവ്വാഴ്ച ഉച്ചകഴിഞ്ഞാണ് ആക്രമണം നടന്നതെന്നും പ്രതിയെ ഇതിനകം അറസ്റ്റ് ചെയ്തിട്ടുണ്ടെന്നും പോലീസ് പറഞ്ഞു. 

66 കാരനായ പട്ടേല്‍ അകോട്ട് താലൂക്കിലെ മൊഹാല ഗ്രാമത്തിലെ ജുമാ മസ്ജിദില്‍ നമസ്‌കാരം നടത്തിയതിന് തൊട്ടുപിന്നാലെ ഉച്ചയ്ക്ക് 1.30 ഓടെയാണ് ആക്രമണത്തിന് ഇരയായതെന്ന് പോലീസ് പറഞ്ഞു. മൂര്‍ച്ചയുള്ള ആയുധം ഉപയോഗിച്ച് പട്ടേലിന്റെ കഴുത്തിലും നെഞ്ചിലും ഗുരുതരമായി മുറിവേല്‍പ്പിച്ചതായും ഇത് കനത്ത രക്തസ്രാവമുണ്ടാക്കിയതായും അവര്‍ പറഞ്ഞു. 

ആക്രമണത്തിന് തൊട്ടുപിന്നാലെ രക്തത്തില്‍ കുളിച്ച വസ്ത്രങ്ങളുമായി പട്ടേല്‍ പള്ളിയില്‍ നിന്ന് പുറത്തേക്ക് ഇറങ്ങുന്നത് കാണിക്കുന്ന വീഡിയോകള്‍ ഓണ്‍ലൈനില്‍ വൈറലായി.

പ്രദേശവാസികള്‍ അദ്ദേഹത്തെ അകോട്ടിലെ ഒരു സ്വകാര്യ ആശുപത്രിയില്‍ എത്തിച്ചു, അവിടെ അദ്ദേഹത്തെ തീവ്രപരിചരണ വിഭാഗത്തില്‍ (ഐസിയു) പ്രവേശിപ്പിച്ചു. പിറ്റേന്ന് രാവിലെ അദ്ദേഹം മരിച്ചു.

സംഭവത്തെത്തുടര്‍ന്ന് പോലീസ് സ്ഥലത്തെത്തി ഫോറന്‍സിക് വിദഗ്ധരുടെ സഹായത്തോടെ തെളിവുകള്‍ ശേഖരിച്ചു. അക്രമിയെ കണ്ടെത്താന്‍ ആറ് സംഘങ്ങള്‍ രൂപീകരിച്ചു.

ചൊവ്വാഴ്ച രാത്രി 8 മണിയോടെ അകോട്ട് താലൂക്കിലെ പനാജ് ഗ്രാമത്തില്‍ നിന്ന് ഉബേദ് ഖാന്‍ കലു ഖാന്‍ എന്ന റാസിക് ഖാന്‍ പട്ടേല്‍ (22) എന്ന പ്രതിയെ അറസ്റ്റ് ചെയ്തതായി അഡീഷണല്‍ പോലീസ് സൂപ്രണ്ട് ബി ചന്ദ്രകാന്ത് റെഡ്ഡി സ്ഥിരീകരിച്ചു.