കര്‍ശനമായ ഐസൊലേഷന്‍ നിര്‍ബന്ധം. പാരസെറ്റമോള്‍, കഫ് സിറപ്പുകള്‍ തുടങ്ങിയ മരുന്നുകളും ഓക്സിജനോടൊപ്പം മറ്റ് മരുന്നുകളും കരുതിവെക്കണം. എച്ച്എംപിവിയില്‍ ആശുപത്രികള്‍ക്ക് ജാഗ്രതാ നിര്‍ദേശവുമായി ഡല്‍ഹി

ഡല്‍ഹി: എച്ച്എംപിവിയില്‍ ആശുപത്രികള്‍ക്ക് ജാഗ്രതാ നിര്‍ദേശവുമായി ഡല്‍ഹി ആരോഗ്യവകുപ്പ്. പാരസെറ്റമോള്‍, കഫ് സിറപ്പുകള്‍ തുടങ്ങിയ മരുന്നുകളും ഓക്സിജനോടൊപ്പം മറ്റ് മരുന്നുകളും കരുതിവെക്കണമെന്നാണ് നിര്‍ദേശം.

ഹ്യൂമന്‍ മെറ്റാപ്ന്യൂമോവൈറസും മറ്റ് ശ്വാസകോശ സംബന്ധമായ വൈറസുകളുമായി ബന്ധപ്പെട്ട ആരോഗ്യ വെല്ലുവിളികള്‍ നേരിടുന്നതിന് തയ്യാറെടുക്കുന്നതിനുള്ള നിര്‍ദേശമാണ് ഡല്‍ഹി ആരോഗ്യ വകുപ്പ് അധികൃതര്‍ ഞായറാഴ്ച പുറത്തിറക്കിയത്

കൃത്യമായ നിരീക്ഷണം ഉറപ്പാക്കുന്നതിന് ഗുരുതരമായ അക്യൂട്ട് റെസ്പിറേറ്ററി അണുബാധ കേസുകളുടെയും ലാബ് സ്ഥിരീകരിച്ച ഇന്‍ഫ്‌ലുവന്‍സ കേസുകളുടെയും വിശദമായ രേഖകള്‍ സൂക്ഷിക്കാനും നിര്‍ദ്ദേശം നല്‍കി.

പാരസെറ്റമോള്‍, ആന്റി ഹിസ്റ്റാമൈന്‍സ്, ബ്രോങ്കോഡിലേറ്ററുകള്‍, കഫ് സിറപ്പുകള്‍ തുടങ്ങിയ മരുന്നുകളും ഓക്സിജനോടൊപ്പം നേരിയ തോതിലുള്ള രോഗങ്ങളെ ചികിത്സിക്കുന്നതിനുള്ള മരുന്നുകളും കരുതിവെക്കാനും നിര്‍ദേശിച്ചു.

ഇന്റഗ്രേറ്റഡ് ഹെല്‍ത്ത് ഇന്‍ഫര്‍മേഷന്‍ പ്ലാറ്റ്ഫോം പോര്‍ട്ടലില്‍ ഇന്‍ഫ്‌ലുവന്‍സ പോലുള്ള അസുഖം (ഐഎല്‍ഐ), സിവിയര്‍ അക്യൂട്ട് റെസ്പിറേറ്ററി ഇന്‍ഫെക്ഷന്‍ കേസുകള്‍ റിപ്പോര്‍ട്ട് ചെയ്യാന്‍ ആശുപത്രികള്‍ക്ക് നിര്‍ദ്ദേശം നല്‍കിയിട്ടുണ്ടെന്ന് വാര്‍ത്താ ഏജന്‍സിയായ പിടിഐ റിപ്പോര്‍ട്ട് ചെയ്തു

സംശയാസ്പദമായ കേസുകളില്‍ കര്‍ശനമായ ഐസൊലേഷന്‍ പ്രോട്ടോക്കോളുകളും സാര്‍വത്രിക മുന്‍കരുതലുകളും നിര്‍ബന്ധമാക്കിയിട്ടുണ്ട്.