/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2026/02/24/home-affair-2026-02-24-09-47-51.jpg)
ഡല്ഹി: രാജ്യത്തെ ഭീകരവാദ പ്രവര്ത്തനങ്ങള് തടയുന്നതിനും നേരിടുന്നതിനുമുള്ള ഇന്ത്യയുടെ ആദ്യത്തെ ദേശീയ കൗണ്ടര് ടെററിസം നയം കേന്ദ്ര ആഭ്യന്തര മന്ത്രാലയം പുറത്തിറക്കി.
''പ്രഹാര്'' എന്ന് പേരിട്ടിരിക്കുന്ന ഈ നയരേഖ, ആധുനിക സാങ്കേതികവിദ്യകള് ഉപയോഗിച്ചുള്ള ഭീകരവാദ ഭീഷണികളെ നേരിടാന് സുരക്ഷാ ഏജന്സികളെ സജ്ജമാക്കുന്നതിനുള്ള സമഗ്രമായ മാര്ഗരേഖയാണ്.
ഡ്രോണുകള്, റോബോട്ടിക്സ്, ഡിജിറ്റല് സംവിധാനങ്ങള് എന്നിവ ഉപയോഗിച്ചുള്ള ആക്രമണങ്ങള് വലിയ വെല്ലുവിളിയാണെന്ന് നയം വ്യക്തമാക്കുന്നു. കെമിക്കല്, ബയോളജിക്കല്, റേഡിയോളജിക്കല്, ന്യൂക്ലിയര് തുടങ്ങിയ മാരകവസ്തുക്കള് ഭീകരവാദികള് കൈക്കലാക്കുന്നത് തടയുക എന്നത് സുരക്ഷാ ഏജന്സികള്ക്ക് വലിയ വെല്ലുവിളിയാണ്.
വിദേശ രാജ്യങ്ങളുടെ പിന്തുണയോടെയുള്ള സൈബര് ആക്രമണങ്ങള് ഇന്ത്യയുടെ തന്ത്രപ്രധാന മേഖലകളെ ലക്ഷ്യം വെക്കുന്നു. പാകിസ്ഥാന് കേന്ദ്രമായുള്ള ജിഹാദി ഗ്രൂപ്പുകള്ക്ക് പുറമെ അല്-ഖ്വയ്ദ, ഐസിസ് തുടങ്ങിയ ആഗോള ഭീകരസംഘടനകളും ഇന്ത്യയെ ലക്ഷ്യം വെക്കുന്നതായി റിപ്പോര്ട്ട് ചൂണ്ടിക്കാട്ടുന്നു.
ഇന്റലിജന്സ് ബ്യൂറോയുടെ കീഴിലുള്ള ഈ പ്ലാറ്റ്ഫോം വഴി കേന്ദ്ര-സംസ്ഥാന ഏജന്സികള് തത്സമയം വിവരങ്ങള് കൈമാറും. അവിശുദ്ധ ആയുധ ഇടപാടുകാരും ഭീകരവാദികളും തമ്മിലുള്ള ബന്ധം തകര്ക്കുന്നതിനും ഭീകരപ്രവര്ത്തനങ്ങള്ക്കുള്ള പണമൊഴുക്ക് തടയുന്നതിനും നിയമപരമായ നടപടികള് കര്ശനമാക്കും.
യുവാക്കളെ തീവ്രവാദത്തിലേക്ക് ആകര്ഷിക്കുന്നത് തടയാന് മതനേതാക്കളെയും എന്.ജി.ഒകളെയും ഉള്പ്പെടുത്തി ബോധവല്ക്കരണ പരിപാടികള് നടത്തും. ജയിലുകളില് തീവ്രവാദ ആശയങ്ങള് പ്രചരിക്കുന്നത് തടയാന് ഡി-റാഡിക്കലൈസേഷന് പ്രോഗ്രാമുകള് നടപ്പിലാക്കും.
ഭീകരാക്രമണമുണ്ടായാല് ആദ്യം പ്രതികരിക്കുന്നത് പ്രാദേശിക പോലീസായിരിക്കും. അവര്ക്ക് സഹായമായി നാഷണല് സെക്യൂരിറ്റി ഗാര്ഡ് പോലുള്ള പ്രത്യേക സേനകള് പ്രവര്ത്തിക്കും. കുറ്റവാളികള്ക്ക് ശിക്ഷ ഉറപ്പാക്കുന്നതിലൂടെ ഭാവിയിലെ ആക്രമണങ്ങള് തടയാന് നാഷണല് ഇന്വെസ്റ്റിഗേഷന് ഏജന്സി നടത്തുന്ന അന്വേഷണങ്ങള്ക്ക് സാധിക്കുമെന്നും നയരേഖയില് പറയുന്നു.
രാജ്യാന്തര തലത്തില് വിവരങ്ങള് പങ്കുവെക്കുന്നതിനും പിടികിട്ടാപ്പുള്ളികളെ കൈമാറുന്നതിനും വിദേശ രാജ്യങ്ങളുമായുള്ള ഉടമ്പടികള് കൂടുതല് ശക്തമാക്കാനും 'പ്രഹാര്' ലക്ഷ്യമിടുന്നു.