കാലിന് പരിക്കേറ്റ് ആശുപത്രിയിൽ പ്രവേശിപ്പിച്ചു; മഹാരാഷ്ട്ര സ്വദേശിയെ വാട്ടർ ടാങ്കിൽ മരിച്ചനിലയിൽ കണ്ടെത്തി

ഡല്‍ഹി: ദിയോറിയയിലെ മഹര്‍ഷി ദിയോറഹ ബാബ മെഡിക്കല്‍ കോളേജില്‍ നിന്ന് കാണാതായ മഹാരാഷ്ട്ര സ്വദേശിയായ 61 കാരനെ ആശുപത്രിയിലെ വാട്ടര്‍ ടാങ്കിനുള്ളില്‍ മരിച്ച നിലയില്‍ കണ്ടെത്തി. താനെ സ്വദേശിയായ അശോക് ഗവാണ്ടെയാണ് കൊല്ലപ്പെട്ടതെന്ന് തിരിച്ചറിഞ്ഞിട്ടുണ്ട്.

കാലിന് പരിക്കേറ്റതിനെ തുടര്‍ന്ന് സെപ്റ്റംബര്‍ 27 ന് 108 ആംബുലന്‍സില്‍ ഗവാണ്ടെയെ ആശുപത്രിയിലെ അത്യാഹിത വിഭാഗത്തിലേക്ക് കൊണ്ടുവന്നതായി ഉദ്യോഗസ്ഥര്‍ പറഞ്ഞു. സ്വന്തം പേരിലാണ് അദ്ദേഹത്തെ പ്രവേശിപ്പിച്ചതെന്ന് ആശുപത്രി രേഖകള്‍ സ്ഥിരീകരിച്ചു.

ദിവസങ്ങള്‍ക്ക് ശേഷം, ഗവാണ്ടെയെ വാര്‍ഡില്‍ നിന്ന് കാണാതായപ്പോള്‍, ആശുപത്രി അധികൃതര്‍ പോലീസിനെ അറിയിച്ചു. അന്വേഷണത്തിനിടെ, അഞ്ചാം നിലയില്‍ നിന്ന് പോലീസ് ഒരു ഷര്‍ട്ടും ബെഡ്ഷീറ്റും കണ്ടെത്തി, രണ്ടും ഗവാണ്ടെയുടേതാണെന്ന് തിരിച്ചറിഞ്ഞു. 

ഒക്ടോബര്‍ 6 ന്, ഒപിഡിയിലേക്കും വാര്‍ഡ് കെട്ടിടങ്ങളിലേക്കും വിതരണം ചെയ്യുന്ന വെള്ളത്തില്‍ നിന്ന് ദുര്‍ഗന്ധം വമിക്കുന്നത് ആശുപത്രി ജീവനക്കാര്‍ ശ്രദ്ധിച്ചു. 

സിമന്റ് ചെയ്ത വാട്ടര്‍ ടാങ്ക് വൃത്തിയാക്കാന്‍ ഒരു മെയിന്റനന്‍സ് സംഘം അഞ്ചാം നിലയിലേക്ക് കയറിയപ്പോള്‍, അകത്ത് ഒരു മൃതദേഹം പൊങ്ങിക്കിടക്കുന്നത് അവര്‍ കണ്ടെത്തി. ഉടന്‍ തന്നെ പോലീസിനെ അറിയിക്കുകയും മൃതദേഹം പുറത്തെടുത്ത് പോസ്റ്റ്മോര്‍ട്ടത്തിനായി അയയ്ക്കുകയും ചെയ്തു.