മൊറാദാബാദിലെ ഹോട്ടലിൽ ഉണ്ടായ വൻ തീപിടുത്തത്തിൽ ഒരാൾ മരിച്ചു, നിരവധി പേർക്ക് പരിക്കേറ്റു

മൊറാദാബാദ്: ഉത്തര്‍പ്രദേശിലെ മൊറാദാബാദിലുള്ള ക്ലാര്‍ക്ക്‌സ് ഇന്‍ ഹോട്ടലിന്റെ താഴത്തെ നിലയിലെ ഒരു റസ്റ്റോറന്റില്‍ തിങ്കളാഴ്ച വന്‍ തീപിടുത്തമുണ്ടായി, ഒരാള്‍ മരിച്ചതായി അധികൃതര്‍ അറിയിച്ചു.

തീപിടുത്തത്തില്‍ കുറഞ്ഞത് നാല് സിലിണ്ടറുകള്‍ പൊട്ടിത്തെറിച്ചതായും, ഹോട്ടലിന്റെ മറ്റ് നിലകളിലേക്കും തീ പടര്‍ന്നതായും അവര്‍ പറഞ്ഞു. 

മരിച്ചത് 56 വയസ്സുള്ള മായയാണെന്ന് തിരിച്ചറിഞ്ഞതായും തീപിടുത്തത്തില്‍ ആറ് പേര്‍ക്ക് പരിക്കേറ്റതായും ഉദ്യോഗസ്ഥര്‍ പറഞ്ഞു. 'ആകെ ഏഴ് രോഗികളെ ഇവിടെ കൊണ്ടുവന്നു.

അവരില്‍ ഒരാളായ 56 വയസ്സുള്ള മായ മരിച്ചു... ബാക്കിയുള്ള രോഗികള്‍ സുഖം പ്രാപിച്ചു,' മൊറാദാബാദ് ജില്ലാ ആശുപത്രിയിലെ എമര്‍ജന്‍സി മെഡിക്കല്‍ ഓഫീസര്‍ ഡോ. ജുനൈദ് അസാരി വാര്‍ത്താ ഏജന്‍സിയായ എഎന്‍ഐയോട് പറഞ്ഞു.

ഞായറാഴ്ച രാത്രി 10 മണിയോടെ തീപിടിത്തത്തെക്കുറിച്ച് തങ്ങള്‍ക്ക് ഒരു കോള്‍ ലഭിച്ചതായും തുടര്‍ന്ന് രണ്ട് ഫയര്‍ ടെന്‍ഡറുകള്‍ സ്ഥലത്തെത്തിയതായും ഉദ്യോഗസ്ഥര്‍ പറഞ്ഞു.

തീ മറ്റ് നിലകളിലേക്ക് പടര്‍ന്നതിനാല്‍ നിരവധി പേര്‍ കുടുങ്ങി. അവരില്‍ നാല് സ്ത്രീകളും രണ്ട് കുട്ടികളും ഉള്‍പ്പെടെ 16 പേരെ രക്ഷപ്പെടുത്തിയതായി ഉദ്യോഗസ്ഥര്‍ പറഞ്ഞു.

തീപിടിത്തത്തിന്റെ കാരണം ഇതുവരെ അറിവായിട്ടില്ല, ഉദ്യോഗസ്ഥര്‍ അന്വേഷണം ആരംഭിച്ചിട്ടുണ്ട്.