ബിഹാറിലെ ദനാപൂരിൽ വീടിന്റെ മേൽക്കൂര തകർന്നുവീണ് ഒരു കുടുംബത്തിലെ അഞ്ച് പേർ ഉറക്കത്തിൽ മരിച്ചു

പട്‌ന: ബിഹാറിലെ പട്ന ജില്ലയിലെ ദനാപൂര്‍ പ്രദേശത്ത് വീടിന്റെ മേല്‍ക്കൂര തകര്‍ന്നുവീണ് ഒരേ കുടുംബത്തിലെ അഞ്ച് പേര്‍ മരിച്ചു. അകില്‍പൂര്‍ പോലീസ് സ്റ്റേഷന്‍ പരിധിയിലുള്ള മനസ് ഗ്രാമത്തിലാണ് ദാരുണമായ സംഭവം.

ഇന്ദിരാ ആവാസ് യോജന പദ്ധതി പ്രകാരം നിര്‍മ്മിച്ച വീടാണ് തകര്‍ന്നുവീണത്. മരിച്ചത് ബബ്ലു ഖാന്‍, ഭാര്യ റോഷന്‍ ഖാത്തൂണ്‍, മകന്‍ മുഹമ്മദ് ചന്ദ്, മകള്‍ റുക്ഷര്‍, ഇളയ മകള്‍ ചാന്ദ്‌നി എന്നിവരാണെന്ന് തിരിച്ചറിഞ്ഞതായി റിപ്പോര്‍ട്ടുകള്‍ പറയുന്നു. 

അത്താഴത്തിന് ശേഷം ഇരകള്‍ ഉറങ്ങിക്കിടക്കുമ്പോഴാണ് മേല്‍ക്കൂര പെട്ടെന്ന് ഇടിഞ്ഞ് വീണ് കുടുംബം അവശിഷ്ടങ്ങള്‍ക്കടിയില്‍ കുടുങ്ങിയത്. ശബ്ദം കേട്ട് നാട്ടുകാര്‍ ഓടിയെത്തി, പക്ഷേ സഹായം എത്തുമ്പോഴേക്കും അഞ്ച് പേരും മരണത്തിന് കീഴടങ്ങിയിരുന്നു.

പിന്നീട് പോലീസും രക്ഷാപ്രവര്‍ത്തകരും ചേര്‍ന്ന് അവശിഷ്ടങ്ങള്‍ക്കിടയില്‍ നിന്ന് മൃതദേഹങ്ങള്‍ പുറത്തെടുത്ത് പോസ്റ്റ്മോര്‍ട്ടത്തിനായി അയച്ചു. സംഭവത്തില്‍ അന്വേഷണം ആരംഭിച്ചു.

ഇന്ദിരാ ആവാസ് യോജന പ്രകാരം വര്‍ഷങ്ങള്‍ക്ക് മുമ്പ് നിര്‍മ്മിച്ച വീട്, മേല്‍ക്കൂരയില്‍ ദൃശ്യമായ വിള്ളലുകളോടൊപ്പം ജീര്‍ണാവസ്ഥയിലായിരുന്നതായി റിപ്പോര്‍ട്ടുണ്ട്. സാമ്പത്തിക ബുദ്ധിമുട്ടുകള്‍ കാരണം, കുടുംബത്തിന് അറ്റകുറ്റപ്പണികള്‍ നടത്താന്‍ കഴിഞ്ഞില്ല.