നുഴഞ്ഞുകയറ്റ ശ്രമത്തിനിടെ ഭീകരരുടെ നിരയില്‍ 'മനുഷ്യ ജിപിഎസ്' എന്നറിയപ്പെടുന്ന ബാഗു ഖാനെ സുരക്ഷാ സേന വധിച്ചു

ഡല്‍ഹി: നൗഷേര നാര്‍ പ്രദേശത്ത് നിന്നുള്ള ഒരു നുഴഞ്ഞുകയറ്റ ശ്രമത്തിനിടെ ഭീകരരുടെ നിരയില്‍ 'മനുഷ്യ ജിപിഎസ്' എന്നറിയപ്പെടുന്ന ബാഗു ഖാനെ സുരക്ഷാ സേന വധിച്ചു. ഗുരേസില്‍ നടന്ന ഏറ്റുമുട്ടലിലാണ് ഇയാളെ വധിച്ചത്. മറ്റൊരു തീവ്രവാദിയോടൊപ്പമാണ് ബാഗു ഖാന്‍ വെടിയേറ്റ് മരിച്ചത്.  

സമന്ദര്‍ ചാച്ച എന്നും അറിയപ്പെടുന്ന ബാഗു ഖാന്‍ 1995 മുതല്‍ പാക് അധീന കശ്മീരില്‍ ആസ്ഥാനമാക്കി പ്രവര്‍ത്തിക്കുകയായിരുന്നു. ഗുരെസ് മേഖലയിലെ വിവിധ പ്രദേശങ്ങളില്‍ നിന്നുള്ള നൂറിലധികം നുഴഞ്ഞുകയറ്റ ശ്രമങ്ങള്‍ക്ക് നേതൃത്വം നല്‍കിയിരുന്നുവെന്ന് സുരക്ഷാ ഗ്രിഡിലെ വൃത്തങ്ങള്‍ പറയുന്നു.

പ്രദേശത്തിന്റെ ദുര്‍ഘടമായ ഭൂപ്രകൃതിയെക്കുറിച്ചും രഹസ്യ വഴികളെക്കുറിച്ചുമുള്ള ഇയാളുടെ സൂക്ഷ്മമായ അറിവ് കാരണം അവയില്‍ ഭൂരിഭാഗവും വിജയിച്ചു. അതുകൊണ്ടുതന്നെ എല്ലാ ഭീകര ഗ്രൂപ്പുകള്‍ക്കും ഇയാള്‍ പ്രിയങ്കരനായിരുന്നു.