അവസാന നിമിഷം സര്‍വീസ് റദ്ദാക്കി; യാത്രക്കാരന്റെ പരാതിയില്‍ നടപടി; ഇന്‍ഡിഗോ തിരികെ നല്‍കേണ്ടത് വന്‍ തുക

ഹൈദരാബാദ്: അവസാന നിമിഷം സര്‍വീസ് റദ്ദാക്കിയതിന്‌ അസൗകര്യം നേരിട്ട യാത്രക്കാരന് 4.14 ലക്ഷം രൂപ തിരികെ നൽകാൻ ഇൻഡിഗോ എയർലൈൻസിന് ഹൈദരാബാദിലെ ജില്ലാ ഉപഭോക്തൃ തർക്ക പരിഹാര കമ്മീഷന്റെ നിര്‍ദ്ദേശം.

റീഫണ്ടിനൊപ്പം, ഫ്ലൈറ്റ് മാറ്റം കാരണം യാത്രക്കാരനുണ്ടായ അധിക ചെലവുകള്‍ കണക്കിലെടുത്ത്‌ എയർലൈനിനോട് 1.47 ലക്ഷം രൂപ അധികമായി നൽകാനും ഉത്തരവിട്ടിട്ടുണ്ട്.

പരാതിക്കാരനായ പി നവരതൻ മകളുടെ വിവാഹത്തിനായി 2023 ജൂൺ 11 ന് ചെന്നൈയിൽ നിന്ന് അഹമ്മദാബാദിലേക്കും അഹമ്മദാബാദിൽ നിന്ന് ഇൻഡോറിലേക്കും പോകാൻ ഫെബ്രുവരി 28 ന് ഇൻഡിഗോ എയർലൈൻസിൽ 50 ടിക്കറ്റുകൾ ബുക്ക് ചെയ്തിരുന്നു.

ഈ ടിക്കറ്റുകൾക്കായി 4,14,150 രൂപ നൽകി. വിമാനം മൂന്ന് മണിക്കൂറിലധികം വൈകുമെന്ന്‌ 2023 മെയ് 27 ന് ട്രാവൽ ഏജൻ്റ് അദ്ദേഹത്തെ അറിയിച്ചു. ബദൽ പരിഹാരത്തിനായി ഇൻഡിഗോയോട് ആവശ്യപ്പെട്ടിട്ടും എയർലൈൻ ഒരു സഹായവും വാഗ്ദാനം ചെയ്തില്ലെന്നാണ് ആരോപണം.

വിവാഹത്തിന് ദിവസങ്ങൾ മാത്രം ബാക്കി നിൽക്കെ നവരതന് 50 പുതിയ ടിക്കറ്റുകൾ ബുക്ക് ചെയ്യുകയല്ലാതെ മറ്റ് മാർഗമില്ലായിരുന്നു. ഇതിന് 5.61 ലക്ഷം രൂപ ചെലവായി. സാമ്പത്തിക നഷ്ടവും അസൗകര്യവും ചൂണ്ടിക്കാട്ടി നവരതൻ ഉപഭോക്തൃ കമ്മീഷനിൽ പരാതി നൽകുകയായിരുന്നു.

സര്‍വീസിലെ കാലതാമസം മെയ് 10 ന് ഇമെയിൽ വഴിയും മെയ് 11 ന് എസ്എംഎസ് വഴിയും യാത്രക്കാരെ അറിയിച്ചിരുന്നുവെന്ന് ഇന്‍ഡിഗോ പറയുന്നു. മറ്റൊരു വിമാനം തിരഞ്ഞെടുക്കുന്നതിനോ അല്ലെങ്കിൽ മുഴുവൻ റീഫണ്ടിനായി ബുക്കിംഗ് റദ്ദാക്കുന്നതിനോ ഓപ്ഷന്‍ നല്‍കിയിരുന്നു. മെയ് 30 വരെ യാത്രക്കാരൻ പ്രതികരിച്ചില്ലെന്നും എയർലൈൻ അവകാശപ്പെട്ടു.

ഒറിജിനൽ ടിക്കറ്റുകൾക്കായി നൽകിയ 4.14 ലക്ഷം രൂപ തിരികെ നൽകാനും 1.47 ലക്ഷം രൂപ അധിക ചെലവ് വഹിക്കാനും നവരതന് നഷ്ടപരിഹാരവും നിയമ ചെലവുമായി 30,000 രൂപയും നൽകാനും കമ്മീഷൻ ഇൻഡിഗോയോട് ഉത്തരവിട്ടു.