ഐഎംഎഫ് എക്സിക്യൂട്ടീവ് ഡയറക്ടർ കൃഷ്ണമൂർത്തി സുബ്രഹ്മണ്യത്തെ ഇന്ത്യ പിൻവലിച്ചു

ഡല്‍ഹി: അന്താരാഷ്ട്ര നാണയ നിധിയിലെ എക്‌സിക്യൂട്ടീവ് ഡയറക്ടര്‍ സ്ഥാനത്തുള്ള ഡോ. കൃഷ്ണമൂര്‍ത്തി സുബ്രഹ്‌മണ്യനെ പിന്‍വലിച്ച് ഇന്ത്യ. 2022 ഓഗസ്റ്റില്‍ സര്‍ക്കാര്‍ നാമനിര്‍ദ്ദേശം ചെയ്ത അദ്ദേഹം 2022 നവംബര്‍ 1 ന് ആണ് എക്‌സിക്യൂട്ടീവ് ഡയറക്ടറായി ചുമതലയേറ്റത്.

അദ്ദേഹത്തിന്റെ മൂന്ന് വര്‍ഷത്തെ കാലാവധി അവസാനിക്കാന്‍ ഇനിയും ആറ് മാസം ബാക്കി നില്‍ക്കെയാണ് ഇന്ത്യയുടെ നീക്കം.

'അന്താരാഷ്ട്ര നാണയ നിധിയിലെ എക്‌സിക്യൂട്ടീവ് ഡയറക്ടര്‍ സ്ഥാനത്ത് നിന്ന് ഡോ. കൃഷ്ണമൂര്‍ത്തി സുബ്രഹ്‌മണ്യനെ ഉടന്‍ പിരിച്ചുവിടാന്‍ കാബിനറ്റ് നിയമന സമിതി (എസിസി) അംഗീകാരം നല്‍കി,' ഏപ്രില്‍ 30 ന് പുറത്തിറങ്ങിയ എസിസിയുടെ ഉത്തരവില്‍ പറയുന്നു.

2018 മുതല്‍ 2021 വരെ ഇന്ത്യയുടെ മുഖ്യ സാമ്പത്തിക ഉപദേഷ്ടാവായി സുബ്രഹ്‌മണ്യന്‍ സേവനമനുഷ്ഠിച്ചു.

ഐഎംഎഫിന്റെ ഔദ്യോഗിക വെബ്സൈറ്റ് പ്രകാരം, കൃഷ്ണമൂര്‍ത്തി സുബ്രഹ്‌മണ്യന്‍ മെയ് 2 വരെ എക്‌സിക്യൂട്ടീവ് ഡയറക്ടറായി പട്ടികപ്പെടുത്തിയിരുന്നു. മെയ് 9 ന് നടക്കുന്ന ഐഎംഎഫ് എക്‌സിക്യൂട്ടീവ് ബോര്‍ഡ് യോഗത്തിന് ദിവസങ്ങള്‍ക്ക് മുമ്പാണ് സുബ്രഹ്‌മണ്യന്റെ രാജി. 

ഈ യോഗം പാകിസ്ഥാനുള്ള ധനസഹായ ക്രമീകരണങ്ങള്‍ അവലോകനം ചെയ്യും. തീവ്രവാദ ധനസഹായത്തെക്കുറിച്ചുള്ള ആശങ്കകള്‍ ചൂണ്ടിക്കാട്ടി യോഗത്തില്‍ പാകിസ്ഥാന് കൂടുതല്‍ സാമ്പത്തിക സഹായം നല്‍കുന്നതിനെ ഇന്ത്യ എതിര്‍ക്കാന്‍ സാധ്യതയുണ്ട്.

ഏപ്രില്‍ 22 ലെ പഹല്‍ഗാം ഭീകരാക്രമണത്തിന് ശേഷം ഇന്ത്യയും പാകിസ്ഥാനും തമ്മില്‍ വര്‍ദ്ധിച്ചുവരുന്ന സംഘര്‍ഷങ്ങള്‍ക്കിടയിലാണ് ഇത് .