ന്യൂയോർക്കിലെ മാഡിസൺ അവന്യൂവിൽ ഇന്ത്യൻ സംസ്കാര പാരമ്പര്യവും ഐക്യവും വിളിച്ചോതി 43-ാമത് ഇന്ത്യ ഡേ പരേഡ്

ഫെഡറേഷൻ ഓഫ് ഇന്ത്യൻ അസോസിയേഷൻ സംഘടിപ്പിച്ച 43-ാമത് ഇന്ത്യ ഡേ പരേഡ് ന്യൂയോർക്കിലെ മാഡിസൺ അവന്യൂവിൽ അരങ്ങേറി. ആയിരക്കണക്കിന് പ്രവാസികളും പ്രേക്ഷകരും പങ്കെടുത്ത പരിപാടി ഇന്ത്യൻ സംസ്കാര പാരമ്പര്യത്തിൻ്റെ മഹത്തായ പ്രദർശനമായി.

“സർവേ സുഖിനോ ഭവന്തു” (എല്ലാവർക്കും സന്തോഷവും സമൃദ്ധിയും ലഭിക്കട്ടെ) എന്നതാണ് പരേഡിന്റെ തീം. ബോളിവുഡ് താരങ്ങളായ രശ്മിക മന്ദാന്നയും വിജയ് ദേവരകൊണ്ടയും ഗ്രാൻഡ് മാർഷൽസായി പങ്കെടുത്തത് ആഘോഷത്തിന് മിഴിവേകി. 

പരിപാടിയിൽ ന്യൂയോർക്ക് മേയർ എറിക് ആഡംസ്, ഇന്ത്യൻ കോൺസൽ ജനറൽ ബിനയ എസ്. പ്രധാൻ, ഇന്ത്യൻ എംപി സത്‌നാം സിങ് സന്ധു, യു.എസ്. കോൺഗ്രസ്സ് അംഗം ശ്രീതാനേദാർ, നീനാ സിംഗ്, സിബു നായർ എന്നിവർ പങ്കെടുത്തു. ഇന്ത്യൻ-അമേരിക്കൻ സമൂഹത്തിന്റെ സംഭാവനകളെ പ്രശംസിച്ച് നേതാക്കൾ അഭിനന്ദിച്ചു.

FIA പ്രസിഡൻറ് സൗരിൻ പരീഖ് സമൂഹത്തിന്റെ ഐക്യത്തിന്റെയും അഭിമാനത്തിന്റെയും പ്രതീകമാണ് പരേഡ് എന്ന് വ്യക്തമാക്കി. ചെയർമാൻ അങ്കുർ വൈദ്യ ഇന്ത്യൻ സംസ്‌കാരവും അമേരിക്കൻ മൂല്യങ്ങളും ഏകീകരിക്കുന്ന വേദിയായാണ് ഇതിനെ വിശേഷിപ്പിച്ചത്.

34 ഫ്ലോട്ടുകളും, 21 മാർച്ചിംഗ് ഗ്രൂപ്പുകളും, 20 കലാപരിപാടികളും ഇന്ത്യയുടെ വൈവിധ്യത്തെ പ്രതിനിധീകരിച്ചു. ഇസ്കോൺ സംഘത്തിന്റെ ജഗന്നാഥ റഥയാത്ര ആത്മീയ ഭാവം കൂട്ടി. 38 സംസ്കാര സ്റ്റാളുകളും കമ്മ്യൂണിറ്റി എക്സിബിഷനുകളും ഇന്ത്യയുടെ സമ്പന്നമായ പാരമ്പര്യത്തെ പ്രകടിപ്പിച്ചു.

പരമ്പരാഗതവും ആധുനികവുമായ സംഗീത-നൃത്ത പരിപാടികൾ അരങ്ങേറി. അമേരിക്കയിലെ യുവജനങ്ങളിൽ ക്രിക്കറ്റിന്റെ വളർച്ചയെ പ്രതിനിധീകരിച്ച് ക്രിക്മാക്സ് കണക്ട് സ്പോൺസർ ചെയ്ത ഫ്ലോട്ടും ശ്രദ്ധേയമായി.

FIA ഇന്ത്യൻ സംസ്കാരത്തെ ഉയർത്തിക്കാട്ടിക്കൊണ്ട് പ്രവാസി സമൂഹത്തിന്റെ ശക്തിയും ഐക്യവും വീണ്ടും വിളിച്ചോതി.