ഓഗസ്റ്റ് 25 മുതൽ ഇന്ത്യ പോസ്റ്റ് അമേരിക്കയിലേക്കുള്ള പാഴ്സലുകൾ താൽക്കാലികമായി നിർത്തുന്നു

ഡല്‍ഹി: ഈ മാസം അവസാനം പ്രാബല്യത്തില്‍ വരുന്ന യുഎസ് ഡ്യൂട്ടി നിയമങ്ങളില്‍ വരുത്തിയ മാറ്റങ്ങളെത്തുടര്‍ന്ന്, ഓഗസ്റ്റ് 25 മുതല്‍ അമേരിക്കയിലേക്കുള്ള മിക്ക തപാല്‍ ചരക്കുകളും സ്വീകരിക്കുന്നത് താല്‍ക്കാലികമായി നിര്‍ത്തുമെന്ന് തപാല്‍ വകുപ്പ് പ്രഖ്യാപിച്ചു.

ജൂലൈ 30 ന് 800 യുഎസ് ഡോളര്‍ വരെ വിലയുള്ള സാധനങ്ങള്‍ക്ക് ഡ്യൂട്ടി ഫ്രീ ഇളവ് പിന്‍വലിച്ചുകൊണ്ട് യുഎസ് ഉത്തരവ് പുറപ്പെടുവിച്ചു.

ഓഗസ്റ്റ് 29 മുതല്‍, യുഎസിലേക്ക് അയയ്ക്കുന്ന എല്ലാ തപാല്‍ ഇനങ്ങള്‍ക്കും, അവയുടെ മൂല്യം പരിഗണിക്കാതെ, ഇന്റര്‍നാഷണല്‍ എമര്‍ജന്‍സി ഇക്കണോമിക് പവര്‍ ആക്ട് (ഐഇഇപിഎ) താരിഫ് ചട്ടക്കൂടിന് കീഴില്‍ കസ്റ്റംസ് തീരുവ ബാധകമാകും. 100 യുഎസ് ഡോളര്‍ വരെയുള്ള സമ്മാന ഇനങ്ങള്‍ മാത്രമേ ഡ്യൂട്ടി ഫ്രീയായി തുടരുകയുള്ളൂ.

ഉത്തരവ് പ്രകാരം, അന്താരാഷ്ട്ര വിമാനക്കമ്പനികള്‍ക്കും യുഎസ് കസ്റ്റംസ് അംഗീകരിച്ച മറ്റ് 'യോഗ്യതയുള്ള കക്ഷികള്‍ക്കും' മാത്രമേ തപാല്‍ കയറ്റുമതികളില്‍ തീരുവ ശേഖരിക്കാനും അടയ്ക്കാനും കഴിയൂ. 

എന്നാല്‍ ഈ കക്ഷികളെ അംഗീകരിക്കുന്നതിനും ഡ്യൂട്ടി പിരിവ് സജ്ജീകരിക്കുന്നതിനുമുള്ള പ്രക്രിയ ഇതുവരെ വ്യക്തമല്ലാത്തതിനാല്‍, ഓഗസ്റ്റ് 25 ന് ശേഷം യുഎസിലേക്കുള്ള തപാല്‍ പാഴ്‌സലുകള്‍ കൊണ്ടുപോകാന്‍ കഴിയില്ലെന്ന് എയര്‍ലൈനുകള്‍ അറിയിച്ചിട്ടുണ്ട്.