അമേരിക്കയിൽ വാഹനാപകടത്തിൽ രണ്ട് പേർ മരിച്ചു, ഇന്ത്യക്കാരനെതിരെ മനഃപൂർവമല്ലാത്ത നരഹത്യയ്ക്ക് കേസെടുത്തു

ന്യൂയോര്‍ക്ക്: അമേരിക്കയില്‍ ഉണ്ടായ റോഡപകടത്തില്‍ രണ്ട് പേര്‍ മരിച്ചു. ഒരു ട്രക്ക് കാറുമായി കൂട്ടിയിടിച്ചാണ് അപകടം സംഭവിച്ചത്. മരണങ്ങളുമായി ബന്ധപ്പെട്ട് ഇന്ത്യന്‍ വംശജനായ ഒരാളിനെതിരെ ഇപ്പോള്‍ മനഃപൂര്‍വമല്ലാത്ത നരഹത്യയ്ക്ക് കേസെടുത്തിട്ടുണ്ട്. പ്രതി രജീന്ദര്‍ കുമാര്‍ (32) ആണ്.

മനഃപൂര്‍വമല്ലാത്ത നരഹത്യ, അശ്രദ്ധമായ അപായപ്പെടുത്തല്‍ എന്നീ കുറ്റങ്ങളാണ് രജീന്ദര്‍ കുമാറിനെതിരെ ചുമത്തിയിരിക്കുന്നത്. അമേരിക്കയില്‍ നടന്ന അപകടത്തില്‍ വില്യം മിക്ക കാര്‍ട്ടര്‍ (25), ജെന്നിഫര്‍ ലിന്‍ ലോവര്‍ (24) എന്നിവര്‍ കൊല്ലപ്പെട്ടു. അപകടം നടന്ന സമയത്ത് രജീന്ദര്‍ കുമാറാണ് ട്രക്ക് ഓടിച്ചിരുന്നതെന്ന് അന്വേഷണത്തില്‍ വ്യക്തമായി.

അനധികൃത ഇന്ത്യന്‍ കുടിയേറ്റക്കാരനായ രജീന്ദറിനെ അറസ്റ്റ് ചെയ്യുന്നതിനായി ഇമിഗ്രേഷന്‍ ആന്‍ഡ് കസ്റ്റംസ് എന്‍ഫോഴ്സ്മെന്റ് (ഐസിഇ) ഇതിനകം ഒരു വാറണ്ട് പുറപ്പെടുവിച്ചിട്ടുണ്ടെന്ന് യുഎസ് ഡിപ്പാര്‍ട്ട്മെന്റ് ഓഫ് ഹോംലാന്‍ഡ് സെക്യൂരിറ്റി (ഡിഎച്ച്എസ്) അറിയിച്ചു. 

ഒറിഗോണ്‍ സ്റ്റേറ്റ് പോലീസിന്റെ കണക്കനുസരിച്ച്, 2025 നവംബര്‍ 24 ന് രാത്രി ഡെസ്ച്യൂട്ട്‌സ് കൗണ്ടിയില്‍ രണ്ട് വാഹനങ്ങള്‍ കൂട്ടിയിടിച്ച് അപകടം റിപ്പോര്‍ട്ട് ചെയ്യപ്പെട്ടു. 

യുഎസ് ആഭ്യന്തര സുരക്ഷാ വകുപ്പിന്റെ കണക്കനുസരിച്ച്, ഇരുവരും സംഭവസ്ഥലത്ത് വെച്ച് തന്നെ മരിച്ചതായി പ്രഖ്യാപിച്ചു, അതേസമയം ട്രക്ക് ഡ്രൈവര്‍ കുമാറിന് പരിക്കുകളൊന്നുമില്ല.

അപകടം നടന്നയുടനെ രജീന്ദര്‍ കുമാറിനെ അറസ്റ്റ് ചെയ്ത് ഡെസ്ച്യൂട്ട്‌സ് കൗണ്ടി ജയിലിലേക്ക് കൊണ്ടുപോയി.