ഹൈദരാബാദ് വിമാനത്താവളത്തിൽ ബോംബ് ഭീഷണി ഇമെയിൽ. മൂന്ന് വിമാനങ്ങൾ സുരക്ഷിതമായി ലാൻഡ് ചെയ്തു

ഡല്‍ഹി: ഹൈദരാബാദില്‍ വിവിധ സ്ഥലങ്ങളില്‍ നിന്ന് എത്തേണ്ട മൂന്ന് വിമാനങ്ങള്‍ക്ക് ബോംബ് ഭീഷണി ലഭിച്ചതായി രാജീവ് ഗാന്ധി അന്താരാഷ്ട്ര വിമാനത്താവളം അറിയിച്ചു. 

ഹീത്രോയില്‍ നിന്നുള്ള ബ്രിട്ടീഷ് എയര്‍വേയ്സിന്റെ (ബിഎ 277), ഫ്രാങ്ക്ഫര്‍ട്ടില്‍ നിന്നുള്ള ലുഫ്താന്‍സയുടെ (എല്‍എച്ച് 752), കണ്ണൂരില്‍ നിന്നുള്ള ഇന്‍ഡിഗോയുടെ 6ഇ 7178 എന്നീ മൂന്ന് വിമാനങ്ങളെ ലക്ഷ്യമിട്ട് ഞായറാഴ്ച രാത്രി വിമാനത്താവളത്തിന് ഇമെയിലുകള്‍ ലഭിച്ചു.

ഡിസംബര്‍ 7 ന് രാത്രി വൈകിയും ഡിസംബര്‍ 8 ന് പുലര്‍ച്ചെയും വിമാനങ്ങള്‍ ഹൈദരാബാദില്‍ സുരക്ഷിതമായി ലാന്‍ഡ് ചെയ്തു.

കണ്ണൂരില്‍ നിന്ന് ഹൈദരാബാദിലേക്ക് പുറപ്പെട്ട വിമാനം ഡിസംബര്‍ 7 ഞായറാഴ്ച രാത്രി 10:50 ന് ഹൈദരാബാദ് വിമാനത്താവളത്തില്‍ സുരക്ഷിതമായി ഇറങ്ങി. 

ഫ്രാങ്ക്ഫര്‍ട്ടില്‍ നിന്ന് ഹൈദരാബാദിലേക്ക് പുറപ്പെട്ട വിമാനം ഡിസംബര്‍ 8 ന് പുലര്‍ച്ചെ 02:00 ന് സുരക്ഷിതമായി ഇറങ്ങി. 

അതേസമയം, ഹീത്രോയില്‍ നിന്ന് ഹൈദരാബാദിലേക്ക് പുറപ്പെട്ട വിമാനം അല്‍പ്പം വൈകിയെങ്കിലും ഡിസംബര്‍ 8 ന് പുലര്‍ച്ചെ 05:30 ന് സുരക്ഷിതമായി ഇറങ്ങി. മൂന്ന് വിമാനങ്ങള്‍ക്കും എല്ലാ സ്റ്റാന്‍ഡേര്‍ഡ് സുരക്ഷാ പ്രോട്ടോക്കോളുകളും സ്വീകരിച്ചിട്ടുണ്ടെന്ന് വിമാനത്താവളം സ്ഥിരീകരിച്ചു.