ഇൻഡോറിൽ വീടിന് തീപിടിച്ച് 11 വയസ്സുള്ള ആൺകുട്ടി മരിച്ചു, കുടുംബത്തിലെ അഞ്ച് പേർക്ക് പരിക്ക്

ഇന്‍ഡോര്‍: മധ്യപ്രദേശിലെ ഇന്‍ഡോര്‍ നഗരത്തില്‍ ശനിയാഴ്ച പുലര്‍ച്ചെയുണ്ടായ തീപിടുത്തത്തില്‍ 11 വയസ്സുള്ള ആണ്‍കുട്ടി ശ്വാസംമുട്ടി മരിച്ചു, ഒരു കുടുംബത്തിലെ അഞ്ച് പേര്‍ക്ക് പരിക്കേറ്റു.

പുലര്‍ച്ചെ 2.15 ഓടെ ഒരു സ്‌ക്രാപ്പ് ഡീലറുടെ മൂന്ന് നില വീട്ടില്‍ ഷോര്‍ട്ട് സര്‍ക്യൂട്ട് മൂലം തീപിടിത്തമുണ്ടായതായി ജൂനി ഇന്‍ഡോര്‍ പോലീസ് സ്റ്റേഷനിലെ സ്റ്റേഷന്‍ ഹൗസ് ഓഫീസര്‍ അനില്‍ ഗുപ്ത പറഞ്ഞു.

വീടിന്റെ മുന്‍ഭാഗത്താണ് ഫോം, സ്‌പോഞ്ച് എന്നിവയുള്‍പ്പെടെയുള്ള അവശിഷ്ട വസ്തുക്കള്‍ സൂക്ഷിച്ചിരുന്നതെന്നും കുടുംബം പിന്‍ഭാഗത്താണ് താമസിച്ചിരുന്നതെന്നും അദ്ദേഹം പറഞ്ഞു.

'പൊടിയും സ്‌പോഞ്ചും കാരണം തീജ്വാലകള്‍ അതിവേഗം പടര്‍ന്നു,' ഗുപ്ത പിടിഐയോട് പറഞ്ഞു.

ഇടുങ്ങിയ വീടിന് ഒരു പ്രവേശന കവാടം മാത്രമേ ഉണ്ടായിരുന്നുള്ളൂവെന്നും പുക കാരണം പുറത്തേക്ക് കടക്കാന്‍ വഴിയില്ലെന്നും അദ്ദേഹം പറഞ്ഞു.

'ഒന്നാം നിലയില്‍ താമസിക്കുന്ന ഒരു കുടുംബത്തിലെ ആറ് പേര്‍ ശ്വാസംമുട്ടി ബോധരഹിതരായി വീണു, ആര്‍ക്കും പൊള്ളലേറ്റ പരിക്കുകളൊന്നുമില്ല,' അദ്ദേഹം കൂട്ടിച്ചേര്‍ത്തു.

പോലീസും അഗ്‌നിശമന സേനാംഗങ്ങളും ചേര്‍ന്ന് ഇവരെ പുറത്തെടുത്ത് അടുത്തുള്ള ആശുപത്രിയിലേക്ക് കൊണ്ടുപോയി. അവിടെവെച്ച് 11 വയസ്സുള്ള ഒരു ആണ്‍കുട്ടി മരിച്ചതായി ഡോക്ടര്‍മാര്‍ സ്ഥിരീകരിച്ചു.