കോൺഗ്രസ് എംഎൽഎയെ പാകിസ്താനിയെന്ന് വിളിച്ച് ബിജെപി എംഎൽഎ. രാജസ്ഥാൻ നിയമസഭയിൽ ബഹളം

 ജയ്പൂർ: രാജസ്ഥാൻ നിയമസഭയിലെ കോൺഗ്രസ് എംഎൽഎയെ പാകിസ്താനിയെന്ന് വിളിച്ച് ബിജെപി എംഎൽഎ. കോൺഗ്രസിന്റെ റഫീഖ് ഖാനെയെയാണ് ബിജെപിയുടെ ഗോപാൽ ശർമ പാകിസ്താനി എന്ന് വിളിച്ച് അവഹേളിച്ചത്.

നഗരവികസന, ഭവന, തദ്ദേശ സ്വയംഭരണ വകുപ്പുകൾക്കുള്ള ഗ്രാന്റുകൾ സംബന്ധിച്ച ചർച്ചയ്ക്കിടെയാണ് വിവാദം.

 ജയ്പൂരിലെ ആദർശ് നഗറിൽ നിന്നുള്ള കോൺഗ്രസ് എംഎൽഎയാണ് റഫീഖ് ഖാൻ. സിവിൽ ലൈൻസിനെ പ്രതിനിധീകരിക്കുന്ന എംഎൽഎയാണ് ശർമ്മ.

കോൺഗ്രസ് സർക്കാരുകളെയും ബിജെപി സർക്കാരുകളെയും താരതമ്യം ചെയ്ത് ഖാൻ സംസാരിക്കുന്നതിനിടെയാണ് ഗോപാൽ ശർമയുടെ പ്രകോപനം.

റഫീഖ് ഖാൻ സംസാരിക്കുന്നതിനിടെ ഗോപാൽ ശർമ നിരന്തരം ഇടപെടുന്നുണ്ടായിരുന്നു. ഇതിനിടയിലാണ് 'പാകിസ്താനി-പാകിസ്താനി' എന്ന് ഗോപാൽ ശർമ്മ പറയാൻ തുടങ്ങിയത്.

പിന്നാലെ കോൺഗ്രസ് ശക്തമായ പ്രതിഷേധവുമായി രംഗത്ത് എത്തി. ഇതോടെ സഭയിൽ ബഹളമായി. സ്പീക്കർ സന്ദീപ് ശർമ ഇടപെട്ടാണ് അംഗങ്ങളെ പരസ്പരം പോർവിളിയിൽ നിന്നും പിന്തിരിപ്പിച്ചത്.