'മോശം അയൽക്കാരിൽ നിന്ന് സ്വയം പ്രതിരോധിക്കാൻ ഇന്ത്യയ്ക്ക് അവകാശമുണ്ട്': തീവ്രവാദത്തിനെതിരെ ജയശങ്കറിന്റെ കർശന മുന്നറിയിപ്പ്

ഡല്‍ഹി: ഭീകരതയ്ക്കെതിരെ ശക്തമായ സന്ദേശം നല്‍കി വിദേശകാര്യ മന്ത്രി എസ് ജയശങ്കര്‍. ഭീകരതയെ പിന്തുണയ്ക്കുന്ന അയല്‍ക്കാര്‍ക്കെതിരെ സ്വയം പ്രതിരോധിക്കാന്‍ ഇന്ത്യയ്ക്ക് എല്ലാ അവകാശവുമുണ്ടെന്ന് അദ്ദേഹം പറഞ്ഞു.

പാകിസ്ഥാനെ പരാമര്‍ശിച്ച വിദേശകാര്യ മന്ത്രി, നല്ല അയല്‍പക്ക ബന്ധങ്ങള്‍ക്ക് തുടര്‍ച്ചയായ ഭീകരപ്രവര്‍ത്തനങ്ങളുമായി സഹവസിക്കാന്‍ കഴിയില്ലെന്ന് അടിവരയിട്ടു.

'എന്നാല്‍ തീവ്രവാദം തുടരുന്ന മോശം അയല്‍ക്കാരുടെ കാര്യത്തില്‍, ഇന്ത്യയ്ക്ക് സ്വന്തം ജനങ്ങളെ സംരക്ഷിക്കാന്‍ എല്ലാ അവകാശവുമുണ്ട്, ആവശ്യമായതെല്ലാം ചെയ്യും. ഞങ്ങളുടെ വെള്ളം നിങ്ങളുമായി പങ്കിടാന്‍ നിങ്ങള്‍ക്ക് ഞങ്ങളോട് അഭ്യര്‍ത്ഥിക്കാനും ഞങ്ങളുടെ രാജ്യത്ത് തീവ്രവാദം പ്രചരിപ്പിക്കാനും കഴിയില്ല,' മദ്രാസ് ഐഐടിയില്‍ നടന്ന ഒരു പരിപാടിയില്‍ സംസാരിക്കവേ ജയശങ്കര്‍ പറഞ്ഞു.

ഇന്ത്യയുടെ അയല്‍പക്ക നയത്തെക്കുറിച്ച് വിശദീകരിച്ചുകൊണ്ട്, ഇന്ത്യയുടെ സമീപനം 'സാമാന്യബുദ്ധി' അനുസരിച്ചാണെന്ന് അദ്ദേഹം പറഞ്ഞു, സഹകരണപരമായ അയല്‍ക്കാരെയും ശത്രുതാപരമായ അയല്‍ക്കാരെയും വ്യക്തമായി വേര്‍തിരിച്ചറിയുന്നു. 'നിങ്ങള്‍ക്ക് മോശം അയല്‍ക്കാരും ഉണ്ടാകാം. 

നിര്‍ഭാഗ്യവശാല്‍, ഞങ്ങള്‍ക്ക് അങ്ങനെയാണ്. ഒരു രാജ്യം മനഃപൂര്‍വ്വം, സ്ഥിരമായി, പശ്ചാത്താപമില്ലാതെ തീവ്രവാദം തുടരുമെന്ന് തീരുമാനിക്കുകയാണെങ്കില്‍, നമ്മുടെ ജനങ്ങളെ തീവ്രവാദത്തിനെതിരെ സംരക്ഷിക്കാന്‍ നമുക്ക് അവകാശമുണ്ട്. 

ആ അവകാശം ഞങ്ങള്‍ പ്രയോഗിക്കും. ആ അവകാശം ഞങ്ങള്‍ എങ്ങനെ പ്രയോഗിക്കും എന്നത് നമ്മുടെ ഇഷ്ടമാണ്. നമ്മള്‍ എന്ത് ചെയ്യണമെന്നോ ചെയ്യരുതെന്നോ ആര്‍ക്കും പറയാന്‍ കഴിയില്ല. സ്വയം പ്രതിരോധിക്കാന്‍ നമ്മള്‍ ചെയ്യേണ്ടതെല്ലാം ഞങ്ങള്‍ ചെയ്യും,' അദ്ദേഹം പറഞ്ഞു.