ഉക്രെയ്ന്‍ യുദ്ധത്തില്‍ ഇന്ത്യയെ തിരഞ്ഞെടുത്ത് ലക്ഷ്യമിടുന്നത് അന്യായവും നീതീകരിക്കാനാവാത്തതുമാണെന്ന് ജയശങ്കര്‍

ഡല്‍ഹി: റഷ്യ-ഉക്രെയ്ന്‍ യുദ്ധത്തില്‍ ഇന്ത്യയുടെ നിലപാടിനെ തിരഞ്ഞെടുത്ത് വിമര്‍ശനിക്കുന്നതിനെ അമേരിക്കയെയും യൂറോപ്യന്‍ യൂണിയനെയും വിമര്‍ശിച്ച്  വിദേശകാര്യ മന്ത്രി ഡോ. എസ്. ജയശങ്കര്‍.

അത് 'അന്യായവും നീതീകരിക്കാനാവാത്തതുമാണ്' എന്ന് വിദേശകാര്യ മന്ത്രി പറഞ്ഞു. ഇന്ത്യാ സന്ദര്‍ശനത്തിനെത്തിയ പോളിഷ് ഉപപ്രധാനമന്ത്രി റാഡോസ്ലാവ് സിക്കോര്‍സ്‌കിയുമായുള്ള പ്രതിനിധി തല ചര്‍ച്ചകള്‍ക്കിടെയാണ് അദ്ദേഹം ഈ പരാമര്‍ശം നടത്തിയത്. 

'സമീപകാലത്ത്, കഴിഞ്ഞ സെപ്റ്റംബറില്‍ ന്യൂയോര്‍ക്കിലും ഈ ജനുവരിയില്‍ പാരീസിലും, ഉക്രെയ്ന്‍ സംഘര്‍ഷത്തെയും അതിന്റെ പ്രത്യാഘാതങ്ങളെയും കുറിച്ചുള്ള ഞങ്ങളുടെ കാഴ്ചപ്പാടുകള്‍ ഞാന്‍ തുറന്നുപറഞ്ഞിട്ടുണ്ട്. അങ്ങനെ ചെയ്യുന്നതിലൂടെ, ഇന്ത്യയെ തിരഞ്ഞെടുത്ത് ലക്ഷ്യമിടുന്നത് അന്യായവും നീതീകരിക്കാനാവാത്തതുമാണെന്ന് ഞാന്‍ ആവര്‍ത്തിച്ച് അടിവരയിട്ടിട്ടുണ്ട്. ഇന്നും ഞാന്‍ അങ്ങനെ ചെയ്യുന്നു,' അദ്ദേഹം പറഞ്ഞു.

പാകിസ്ഥാന് നേരിട്ടോ അല്ലാതെയോ പിന്തുണ നല്‍കുന്നതിനെതിരെ വിദേശകാര്യ മന്ത്രി പോളണ്ടിന് മുന്നറിയിപ്പ് നല്‍കി, അതിര്‍ത്തി കടന്നുള്ള ഭീകരതയുടെ ദീര്‍ഘകാല വെല്ലുവിളികളെക്കുറിച്ച് പോളിഷ് വിദേശകാര്യ മന്ത്രി കൂടിയായ റാഡോസ്ലാവിന് നന്നായി അറിയാമെന്ന് പറഞ്ഞു.

'ഈ യോഗത്തില്‍ ഈ മേഖലയിലേക്കുള്ള നിങ്ങളുടെ ചില യാത്രകളെക്കുറിച്ച് ചര്‍ച്ച ചെയ്യുമെന്ന് ഞാന്‍ പ്രതീക്ഷിക്കുന്നു. പോളണ്ട് തീവ്രവാദത്തോട് സഹിഷ്ണുത കാണിക്കരുത്, നമ്മുടെ അയല്‍പക്കത്തെ തീവ്രവാദ അടിസ്ഥാന സൗകര്യങ്ങള്‍ വളര്‍ത്താന്‍ സഹായിക്കരുത്,' അദ്ദേഹം പറഞ്ഞു.

അതിര്‍ത്തി കടന്നുള്ള ഭീകരതയെ ചെറുക്കേണ്ടതിന്റെ ആവശ്യകതയില്‍ ഇന്ത്യയോട് യോജിക്കുന്നുവെന്ന് സിക്കോര്‍സ്‌കി പറഞ്ഞു.

പോളിഷ് ട്രെയിനിന് നേരെ അടുത്തിടെ നടന്ന ആക്രമണത്തെക്കുറിച്ച് ചൂണ്ടിക്കാണിച്ചതുപോലെ, പോളണ്ടും 'തീവയ്പ്പുകളുടെയും ഭരണകൂട ഭീകരവാദ ശ്രമങ്ങളുടെയും ഇരയാണ്' എന്ന് അദ്ദേഹം പറഞ്ഞു.