'ഇന്ത്യ ഒരിക്കലും ഭീകരതയെ വെച്ചുപൊറുപ്പിക്കില്ല', പാകിസ്ഥാനെതിരെ വീണ്ടും ആഞ്ഞടിച്ച് ജയശങ്കർ; ബ്രിട്ടനോട് നന്ദി പറഞ്ഞു

ഡല്‍ഹി: ഭീകരതയ്ക്കെതിരെ ഇന്ത്യയ്ക്ക് 'സീറോ ടോളറന്‍സ്' നയമുണ്ടെന്ന് വിദേശകാര്യ മന്ത്രി എസ് ജയശങ്കര്‍. ഭീകരതയെ ഇന്ത്യ ഒരിക്കലും വെച്ചുപൊറുപ്പിക്കില്ലെന്ന് വിദേശകാര്യ മന്ത്രി വ്യക്തമാക്കി. 'ഭീകരത പ്രചരിപ്പിക്കുന്നവരെ' ഇരകളുമായി ഇന്ത്യ ഒരിക്കലും തുലനം ചെയ്യില്ലെന്നും അദ്ദേഹം വ്യക്തമാക്കി.

ആഗോള സമൂഹത്തിന് വ്യക്തമായ സന്ദേശം നല്‍കാനുള്ള ശ്രമമായാണ് ഈ പ്രസ്താവനയെ കാണുന്നത്. കഴിഞ്ഞ മാസം ഇന്ത്യയും പാകിസ്ഥാനും തമ്മിലുള്ള സൈനിക സംഘര്‍ഷം ഉച്ചസ്ഥായിയിലെത്തിയ സമയത്താണ് ഈ പ്രസ്താവന. ബ്രിട്ടീഷ് വിദേശകാര്യ മന്ത്രി ഡേവിഡ് ലാമിയുമായുള്ള സംഭാഷണത്തിലാണ് അദ്ദേഹം ഇക്കാര്യം വ്യക്തമാക്കിയത്.

രണ്ട് ദിവസത്തെ സന്ദര്‍ശനത്തിനായി ശനിയാഴ്ച രാവിലെയാണ് ലാമി ന്യൂഡല്‍ഹിയില്‍ എത്തിയത്. ഇരു രാജ്യങ്ങളും തമ്മിലുള്ള തന്ത്രപരമായ പങ്കാളിത്തത്തിന്റെ വിവിധ വശങ്ങള്‍ അവലോകനം ചെയ്യുക എന്നതാണ് അദ്ദേഹത്തിന്റെ ലക്ഷ്യം. 

ബ്രിട്ടീഷ് വിദേശകാര്യ മന്ത്രാലയത്തിന്റെ പ്രസ്താവന പ്രകാരം, സാമ്പത്തിക, കുടിയേറ്റ ബന്ധങ്ങള്‍ ശക്തിപ്പെടുത്തുന്നതിലും ഇന്ത്യയിലെ ബ്രിട്ടീഷ് ബിസിനസുകാര്‍ക്ക് പുതിയ അവസരങ്ങള്‍ പര്യവേക്ഷണം ചെയ്യുന്നതിലും ലാമിയുടെ സന്ദര്‍ശനം ശ്രദ്ധ കേന്ദ്രീകരിക്കുന്നു.

ജയ്ശങ്കറുമായുള്ള ചര്‍ച്ചയ്ക്ക് മുമ്പ് ലാമി പ്രധാനമന്ത്രി നരേന്ദ്ര മോദിയെ കണ്ടു. പഹല്‍ഗാം ഭീകരാക്രമണത്തെ ശക്തമായി അപലപിച്ചതിനും ഭീകരതയ്ക്കെതിരായ ഇന്ത്യയുടെ പോരാട്ടത്തില്‍ പിന്തുണയ്ക്കും യുകെയോട് ജയ്ശങ്കര്‍ തന്റെ പ്രാരംഭ പ്രസ്താവനയില്‍ നന്ദി പറഞ്ഞു.

'ഭീകരതയ്ക്കെതിരെ ഞങ്ങള്‍ക്ക് ഒരു വിട്ടുവീഴ്ചയില്ലാത്ത നയമുണ്ട്, ഞങ്ങളുടെ പങ്കാളികള്‍ ഇത് മനസ്സിലാക്കുമെന്ന് ഞങ്ങള്‍ പ്രതീക്ഷിക്കുന്നു. ദുഷ്പ്രവൃത്തിക്കാരെ അവരുടെ ഇരകള്‍ക്ക് തുല്യമായി കണക്കാക്കാന്‍ ഞങ്ങള്‍ക്ക് ഒരിക്കലും കഴിയില്ല,' അദ്ദേഹം പറഞ്ഞു.