ജമ്മു കശ്മീരിലെ കുപ്വാരയിൽ നിയന്ത്രണ രേഖയിൽ നുഴഞ്ഞുകയറ്റ ശ്രമം സുരക്ഷാ സേന പരാജയപ്പെടുത്തി. രണ്ട് തീവ്രവാദികളെ വധിച്ചു

ശ്രീനഗര്‍: ജമ്മു കശ്മീരിലെ കുപ്വാര ജില്ലയിലെ മാച്ചില്‍ സെക്ടറില്‍ നിയന്ത്രണ രേഖയില്‍ (എല്‍ഒസി) നുഴഞ്ഞുകയറ്റ ശ്രമം പരാജയപ്പെടുത്തുന്നതിനിടെ സുരക്ഷാ സേന ചൊവ്വാഴ്ച രണ്ട് തീവ്രവാദികളെ വെടിവച്ചു കൊന്നു. പ്രദേശത്ത് വന്‍ തിരച്ചില്‍ ആരംഭിച്ചതായും വൃത്തങ്ങള്‍ അറിയിച്ചു.

നിയന്ത്രണരേഖയില്‍ സംശയാസ്പദമായ നീക്കങ്ങള്‍ കണ്ടെത്തിയതിനെ തുടര്‍ന്ന് തിങ്കളാഴ്ച രാത്രി സംയുക്ത ഓപ്പറേഷന്‍ ആരംഭിച്ചു. സുരക്ഷാ സേന വെടിയുതിര്‍ക്കുകയും രണ്ട് തീവ്രവാദികളുടെ മൃതദേഹങ്ങള്‍ രാവിലെ കണ്ടെടുക്കുകയും ചെയ്തുവെന്ന് വൃത്തങ്ങള്‍ അറിയിച്ചു.

കൂടുതല്‍ സൈനികരെ പ്രദേശത്തേക്ക് അയച്ചിട്ടുണ്ട്, തീവ്രവാദികളില്‍ നിന്നുള്ള കൂടുതല്‍ നുഴഞ്ഞുകയറ്റ ശ്രമം തടയുന്നതിനായി നിലവില്‍ തിരച്ചില്‍ നടക്കുന്നുണ്ട്.

ശൈത്യകാലം ആരംഭിക്കുന്നതിന് മുന്നോടിയായി കശ്മീരിലെ നിയന്ത്രണ രേഖയില്‍ (എല്‍ഒസി) ബിഎസ്എഫ് ജാഗ്രത ശക്തമാക്കിയിട്ടുണ്ട്. നുഴഞ്ഞുകയറ്റ ശ്രമങ്ങള്‍ വര്‍ദ്ധിക്കുമെന്ന ആശങ്ക നിലനില്‍ക്കുന്നതിനാല്‍ അതിര്‍ത്തിക്കപ്പുറത്തുള്ള വിവിധ ലോഞ്ച് പാഡുകളില്‍ തീവ്രവാദികള്‍ നിലയുറപ്പിച്ചിട്ടുണ്ടെന്നും താഴ്വരയിലേക്ക് കടക്കാന്‍ കാത്തിരിക്കുകയാണെന്നും ഇന്റലിജന്‍സ് റിപ്പോര്‍ട്ടുകള്‍ സൂചിപ്പിക്കുന്നു.

'ശൈത്യകാലത്തിന് മുമ്പ് നുഴഞ്ഞുകയറ്റ ശ്രമങ്ങള്‍ വര്‍ദ്ധിക്കാറുണ്ട്. ഇത് മനസ്സില്‍ വെച്ചുകൊണ്ട്, ഞങ്ങള്‍ ഞങ്ങളുടെ ഉദ്യോഗസ്ഥരെ അതീവ ജാഗ്രതയിലാക്കുകയും അതിര്‍ത്തി നിരീക്ഷണം ശക്തമാക്കുകയും ചെയ്തിട്ടുണ്ട്,' വടക്കന്‍ കശ്മീരിലെ ബന്ദിപ്പോര ജില്ലയില്‍ വുലാര്‍ 2.0 മാരത്തണിനിടെ ബിഎസ്എഫ് അഡീഷണല്‍ ഡയറക്ടര്‍ ജനറല്‍ സതീഷ് എസ് ഖണ്ഡാരെ മാധ്യമപ്രവര്‍ത്തകരോട് പറഞ്ഞു.

കൃത്യമായ കണക്കുകള്‍ നല്‍കാന്‍ പ്രയാസമാണെങ്കിലും, അയല്‍രാജ്യം അതിര്‍ത്തിയില്‍ ഒന്നിലധികം ലോഞ്ച് പാഡുകള്‍ സ്ഥാപിക്കുന്നുണ്ടെന്ന് റിപ്പോര്‍ട്ടുകള്‍ സൂചിപ്പിക്കുന്നുവെന്ന് അദ്ദേഹം ചൂണ്ടിക്കാട്ടി.

'അതിര്‍ത്തി കടന്ന് തീവ്രവാദികള്‍ നുഴഞ്ഞുകയറാനുള്ള സാധ്യത എപ്പോഴും നിലനില്‍ക്കുന്നുണ്ട്, എന്നാല്‍ ബിഎസ്എഫും സൈന്യവും ജാഗ്രത പാലിക്കുകയും അത്തരം ശ്രമങ്ങളെ പരാജയപ്പെടുത്താന്‍ സജ്ജരായിരിക്കുകയും ചെയ്യുന്നു,' അദ്ദേഹം പറഞ്ഞു.