പൂഞ്ചിൽ പാകിസ്ഥാൻ വെടിവയ്പ്പിൽ കൊല്ലപ്പെട്ട നിരപരാധികളുടെ കുടുംബങ്ങൾക്ക് അടിയന്തര സഹായം; ഭരണകൂടം ഓരോരുത്തർക്കും സഹായമായി 6 ലക്ഷം രൂപ നൽകി

ജമ്മു: ജമ്മു കശ്മീരിലെ പൂഞ്ചില്‍ പാകിസ്ഥാന്‍ ഷെല്ലാക്രമണത്തില്‍ ദുരിതമനുഭവിക്കുന്നവര്‍ക്ക് ജില്ലാ റെഡ് ക്രോസ് ഫണ്ടില്‍ നിന്ന് അടിയന്തര ദുരിതാശ്വാസവും എക്‌സ്-ഗ്രേഷ്യ സഹായവും വിതരണം ചെയ്തു.

ബുധനാഴ്ച പൂഞ്ചില്‍ പാകിസ്ഥാന്‍ നടത്തിയ ഷെല്ലാക്രമണത്തില്‍ 15 പേര്‍ കൊല്ലപ്പെട്ടതായി റിപ്പോര്‍ട്ടുണ്ട്. മരിച്ചവരുടെ കുടുംബങ്ങള്‍ക്ക് ആറ് ലക്ഷം രൂപ വീതവും ഗുരുതരമായി പരിക്കേറ്റവര്‍ക്ക് 50,000 രൂപയും ചെറിയ പരിക്കേറ്റവര്‍ക്ക് 20,000 രൂപയും ധനസഹായം നല്‍കിയതായി വക്താവ് പറഞ്ഞു.

ഇരകള്‍ക്ക് സമയബന്ധിതമായ സഹായം ഉറപ്പാക്കുന്നതിന് സ്ഥാപിത മാനദണ്ഡങ്ങള്‍ക്കനുസൃതമായാണ് ആശ്വാസം നല്‍കുന്നത്. ദുരിതബാധിതര്‍ക്ക് ആവശ്യമായ എല്ലാ സഹായങ്ങളും നല്‍കുമെന്ന് പൂഞ്ച് ഡിസി വികാസ് കുന്ദല്‍ പറഞ്ഞു.