ഭീകരതയുടെ എല്ലാ രൂപങ്ങളോടും പ്രകടിപ്പിക്കപ്പെടുന്ന എല്ലാ ഭീഷണികളോടും ലോകം പൂജ്യം സഹിഷ്ണുത പ്രകടിപ്പിക്കേണ്ടത് അത്യാവശ്യമാണ്. ഇതിന് ന്യായീകരണമില്ല, കണ്ടില്ലെന്ന് നടിക്കരുത്. പുടിനുമായി കൂടിക്കാഴ്ച നടത്തി ജയശങ്കർ

ഡല്‍ഹി: ഷാങ്ഹായ് കോഓപ്പറേഷന്‍ ഓര്‍ഗനൈസേഷന്‍ (എസ്.സി.ഒ) കൗണ്‍സില്‍ ഓഫ് ഹെഡ്‌സ് ഓഫ് ഗവണ്‍മെന്റ് യോഗത്തിന്റെ ഭാഗമായി വിദേശകാര്യ മന്ത്രി എസ് ജയശങ്കര്‍ ചൊവ്വാഴ്ച മോസ്‌കോയില്‍ റഷ്യന്‍ പ്രസിഡന്റ് വ്ളാഡിമിര്‍ പുടിനുമായി കൂടിക്കാഴ്ച നടത്തി.

ഭീകരവാദം, സാമ്പത്തിക അസ്ഥിരത, സംഘടനാപരമായ പരിഷ്‌കാരങ്ങളുടെ ആവശ്യം എന്നിവ സംബന്ധിച്ച് അദ്ദേഹം ശക്തമായ സന്ദേശം നല്‍കി.

'ഇന്ന് ഉച്ചയ്ക്ക് എസ്.സി.ഒ പ്രതിനിധി സംഘത്തലവന്മാരോടൊപ്പം പ്രസിഡന്റ് പുടിനുമായി കൂടിക്കാഴ്ച നടത്തി,' അദ്ദേഹം എക്‌സില്‍ പോസ്റ്റ് ചെയ്തു.

എസ്.സി.ഒ നേതാക്കളോടുള്ള തന്റെ പ്രസംഗത്തില്‍, ഭീകരതയോടുള്ള ഇന്ത്യയുടെ വിട്ടുവീഴ്ചയില്ലാത്ത നിലപാട് ജയശങ്കര്‍ ആവര്‍ത്തിച്ചു. ഭീകരത, വിഘടനവാദം, തീവ്രവാദം എന്നീ 'മൂന്ന് തിന്മകളെ' ചെറുക്കുന്നതിനുള്ള സ്ഥാപക ദൗത്യത്തില്‍ സംഘടന ഉറച്ചുനില്‍ക്കണം എന്നും അദ്ദേഹം പറഞ്ഞു.

'ഭീകരത, വിഘടനവാദം, തീവ്രവാദം എന്നീ മൂന്ന് തിന്മകളെ ചെറുക്കുന്നതിനാണ് എസ്.സി.ഒ സ്ഥാപിച്ചത് എന്ന് നമ്മള്‍ ഒരിക്കലും മറക്കരുത്. വര്‍ഷങ്ങള്‍ കഴിയുന്തോറും ഈ ഭീഷണികള്‍ കൂടുതല്‍ ഗുരുതരമായിരിക്കുന്നു,' അദ്ദേഹം പറഞ്ഞു.

'ഭീകരതയുടെ എല്ലാ രൂപങ്ങളോടും പ്രകടിപ്പിക്കപ്പെടുന്ന എല്ലാ ഭീഷണികളോടും ലോകം പൂജ്യം സഹിഷ്ണുത പ്രകടിപ്പിക്കേണ്ടത് അത്യാവശ്യമാണ്. ഇതിന് ന്യായീകരണമില്ല, കണ്ടില്ലെന്ന് നടിക്കരുത്, വെള്ളപൂശാനും പാടില്ല,' അദ്ദേഹം കൂട്ടിച്ചേര്‍ത്തു