സഫ്രാനുമായി സഹകരിച്ച് ഇന്ത്യ അഞ്ചാം തലമുറ യുദ്ധവിമാനങ്ങൾക്കുള്ള എഞ്ചിനുകൾ നിർമ്മിക്കും. ഫ്രഞ്ച് എയ്‌റോസ്‌പേസ് ഭീമൻ കമ്പനിയുമായി സഹകരിച്ചായിരിക്കും നിർമ്മാണം നടത്തുകയെന്ന് പ്രതിരോധ മന്ത്രി

ഡല്‍ഹി: ഫ്രഞ്ച് എയ്റോസ്പേസ് ഭീമനായ സഫ്രാനുമായി സഹകരിച്ച് ഇന്ത്യ അഞ്ചാം തലമുറ യുദ്ധവിമാനങ്ങള്‍ക്കുള്ള എഞ്ചിനുകള്‍ നിര്‍മ്മിക്കാന്‍ തുടങ്ങുമെന്ന് പ്രതിരോധ മന്ത്രി രാജ്നാഥ് സിംഗ് പറഞ്ഞു. തദ്ദേശീയ പ്രതിരോധ, എയ്റോസ്പേസ് കഴിവുകള്‍ ശക്തിപ്പെടുത്താനുള്ള ഇന്ത്യയുടെ ശ്രമങ്ങളിലെ ഒരു പ്രധാന ചുവടുവയ്പ്പാണിതെന്ന് അദ്ദേഹം പറഞ്ഞു.

'ഇന്ന്, അഞ്ചാം തലമുറ യുദ്ധവിമാനങ്ങള്‍ നിര്‍മ്മിക്കുന്നതിലേക്ക് ഞങ്ങള്‍ മറ്റൊരു ചുവടുവയ്പ്പ് കൂടി മുന്നോട്ട് വച്ചിരിക്കുന്നു. ഫ്രഞ്ച് കമ്പനിയായ സഫ്രാനുമായി സഹകരിച്ച് ഇന്ത്യയില്‍ തന്നെ അവരുടെ എഞ്ചിനുകള്‍ നിര്‍മ്മിക്കുന്നതിലേക്ക് ഞങ്ങള്‍ ഇപ്പോള്‍ നീങ്ങുകയാണ്.'

ഇന്ത്യയുടെ വളര്‍ന്നുവരുന്ന പ്രതിരോധ നിര്‍മ്മാണ മേഖലയില്‍ പങ്കെടുക്കാന്‍ ആഗോള കമ്പനികളെ ക്ഷണിച്ച രാജ്നാഥ് സിംഗ്, അവര്‍ക്ക് സര്‍ക്കാര്‍ പിന്തുണ ഉറപ്പുനല്‍കി. ഇന്ത്യയുടെ ഊര്‍ജ്ജസ്വലമായ പ്രതിരോധ നിര്‍മ്മാണ ആവാസവ്യവസ്ഥയില്‍ നിക്ഷേപം നടത്താന്‍ വിദേശ കമ്പനികളോടും നിക്ഷേപകരോടും അദ്ദേഹം അഭ്യര്‍ത്ഥിച്ചു.

'ആവശ്യമായ എല്ലാ അംഗീകാരങ്ങളും ഞങ്ങള്‍ നല്‍കും, പിന്തുണയും നല്‍കും' എന്ന് അദ്ദേഹം പറഞ്ഞു. 'മെയ്ക്ക് ഇന്‍ ഇന്ത്യ'യ്ക്ക് പിന്നിലെ വിശാലമായ കാഴ്ചപ്പാട് എടുത്തുകാണിച്ചുകൊണ്ട് രാജ്നാഥ് പറഞ്ഞു,

'ഞങ്ങളുടെ മെയ്ക്ക് ഇന്‍ ഇന്ത്യ സംരംഭം ഇന്ത്യയില്‍ മാത്രം ഒതുങ്ങുന്നില്ല. നിങ്ങള്‍ ഇന്ത്യയില്‍ നിര്‍മ്മിക്കുമ്പോള്‍, നിങ്ങള്‍ ലോകത്തിനായി നിര്‍മ്മിക്കുന്നു.'

അഡ്വാന്‍സ്ഡ് മീഡിയം കോംബാറ്റ് എയര്‍ക്രാഫ്റ്റ് പ്രോഗ്രാമിനായുള്ള നടപ്പാക്കല്‍ മാതൃക പ്രതിരോധ മന്ത്രാലയം അംഗീകരിച്ചതിന് ഏതാനും മാസങ്ങള്‍ക്ക് ശേഷമാണ് ഈ പ്രഖ്യാപനം. കഴിഞ്ഞ ദശകത്തില്‍ പ്രതിരോധ കയറ്റുമതി ഏകദേശം 35 മടങ്ങ് വര്‍ദ്ധിച്ചു.

കഴിഞ്ഞ ദശകത്തില്‍ പ്രതിരോധ കയറ്റുമതി ഏകദേശം 35 മടങ്ങ് വര്‍ദ്ധിച്ചുവെന്നും ഈ വര്‍ഷം പ്രതിരോധ കയറ്റുമതിയില്‍ 30,000 കോടി രൂപയും 2029 ഓടെ 50,000 കോടി രൂപയും കൈവരിക്കുക എന്നതാണ് സര്‍ക്കാര്‍ ലക്ഷ്യമിടുന്നതെന്നും പ്രതിരോധ മന്ത്രി അറിയിച്ചു.