കർണാടകയിലെ മൈസൂരുവിൽ മുഖംമൂടി ധരിച്ച അഞ്ച് പേർ ജ്വല്ലറി കൊള്ളയടിച്ചു; പോലീസ് തിരച്ചിൽ തുടങ്ങി

മൈസൂരു: കര്‍ണാടകയിലെ മൈസൂരു ജില്ലയിലെ ഹുന്‍സൂര്‍ പട്ടണത്തില്‍ മുഖംമൂടി ധരിച്ച അഞ്ച് പേരടങ്ങുന്ന സംഘം ഒരു ജ്വല്ലറിയിലേക്ക് അതിക്രമിച്ചു കയറി തോക്ക് ചൂണ്ടി ഭീഷണിപ്പെടുത്തി കൊള്ളയടിച്ചു. ഞായറാഴ്ച ഉച്ചയ്ക്ക് രണ്ട് മണിയോടെയാണ് അഞ്ച് പ്രതികള്‍ രണ്ട് മോട്ടോര്‍ സൈക്കിളുകളില്‍ എത്തി പട്ടണത്തിലുള്ള ഒരു ജ്വല്ലറിയില്‍ അതിക്രമിച്ചു കയറിയതെന്ന് പോലീസ് പറഞ്ഞു.

കടയിലുണ്ടായിരുന്ന ഏഴ് മുതല്‍ എട്ട് വരെ ജീവനക്കാരെ തോക്കുകള്‍ ചൂണ്ടി ഭീഷണിപ്പെടുത്തി. കടയിലുണ്ടായിരുന്ന ജീവനക്കാര്‍ക്ക് നേരെ തോക്ക് ചൂണ്ടി ആഭരണങ്ങള്‍ നിറയ്ക്കാന്‍ കവര്‍ച്ചക്കാര്‍ നിര്‍ബന്ധിച്ചു. വെറും അഞ്ച് മിനിറ്റിനുള്ളില്‍, വിലപിടിപ്പുള്ള വസ്തുക്കളെല്ലാം കൊള്ളയടിച്ച് സംഘം സംഭവസ്ഥലത്ത് നിന്ന് ഓടി രക്ഷപ്പെട്ടു.

ജ്വല്ലറിയില്‍ സ്ഥാപിച്ചിരുന്ന സിസിടിവി ക്യാമറകളില്‍ ഈ സംഭവത്തിന്റെ മുഴുവന്‍ ദൃശ്യങ്ങളും പതിഞ്ഞിട്ടുണ്ട്.

കവര്‍ച്ച നടന്ന സമയത്ത് ഉച്ചഭക്ഷണത്തിനായി പുറത്തിറങ്ങിയ കട മാനേജര്‍ പ്രതികള്‍ രക്ഷപ്പെടാന്‍ ശ്രമിക്കുന്നതിനിടയിലാണ് തിരിച്ചെത്തിയത്. രക്ഷപ്പെടുന്നതിന് മുമ്പ്, പരിഭ്രാന്തി സൃഷ്ടിക്കുന്നതിനായി കവര്‍ച്ചക്കാര്‍ ആകാശത്തേക്ക് ഒരു റൗണ്ട് വെടിയുതിര്‍ത്തതായി ദൃക്സാക്ഷികള്‍ പറഞ്ഞു.

കുറ്റവാളികളെ പിടികൂടുന്നതിനായി തീവ്രമായ തിരച്ചില്‍ ആരംഭിച്ചതായി സ്ഥലം സന്ദര്‍ശിച്ച ഡെപ്യൂട്ടി ഇന്‍സ്‌പെക്ടര്‍ ജനറല്‍ ഓഫ് പോലീസ് (സതേണ്‍ റേഞ്ച്) എം.ബി. ബോറലിംഗയ്യ പറഞ്ഞു. കേസ് അന്വേഷിക്കാന്‍ പ്രത്യേക സംഘങ്ങള്‍ രൂപീകരിച്ചിട്ടുണ്ട്. സിസിടിവി ദൃശ്യങ്ങളും സ്‌കാന്‍ ചെയ്തിട്ടുണ്ട്.

പ്രതികളെക്കുറിച്ച് പരമാവധി വിവരങ്ങള്‍ ശേഖരിക്കുന്നതിനായി തോക്ക് ചൂണ്ടി ഭീഷണിപ്പെടുത്തിയ ജീവനക്കാരെയും പോലീസ് ചോദ്യം ചെയ്യുന്നുണ്ട്.