പ്രതിപക്ഷത്തിന് താല്പര്യം അരാജകത്വത്തിൽ മാത്രം; രാജ്യസഭയിൽ ആഞ്ഞടിച്ച് ജെ.പി. നദ്ദ

ഡല്‍ഹി: പശ്ചിമേഷ്യന്‍ യുദ്ധത്തെക്കുറിച്ച് വിദേശകാര്യ മന്ത്രി എസ്. ജയശങ്കര്‍ രാജ്യസഭയില്‍ പ്രസ്താവന നടത്തുന്നതിനിടെ പ്രതിപക്ഷം നടത്തിയ പ്രതിഷേധത്തെ കടുത്ത ഭാഷയില്‍ വിമര്‍ശിച്ച് സഭാ നേതാവ് ജെ.പി. നദ്ദ. സഭാനടപടികള്‍ തടസ്സപ്പെടുത്തുന്നതിലും 'അരാജകത്വം സൃഷ്ടിക്കുന്നതിലുമാണ്' പ്രതിപക്ഷത്തിന്റെ താല്പര്യമെന്ന് അദ്ദേഹം ആരോപിച്ചു.

'പ്രതിപക്ഷത്തിന് ഒരിക്കലും ചര്‍ച്ചകളില്‍ താല്പര്യമില്ല. ഗുണ്ടായിസം കാണിക്കുന്നതിലാണ് അവര്‍ക്ക് താല്പര്യം,' എന്ന് നദ്ദ കുറ്റപ്പെടുത്തി. പാര്‍ലമെന്റിലെ സുപ്രധാനമായ പല ചര്‍ച്ചകളില്‍ നിന്നും പ്രതിപക്ഷം നേരത്തെയും ഇറങ്ങിപ്പോയിട്ടുണ്ടെന്ന് അദ്ദേഹം ഓര്‍മ്മിപ്പിച്ചു.

2025 ഡിസംബറിലെ തിരഞ്ഞെടുപ്പ് പരിഷ്‌കാരം, ബഹിരാകാശ പദ്ധതി, വഖഫ് ബില്‍, പഹല്‍ഗാം ഭീകരാക്രമണം, 'ഓപ്പറേഷന്‍ സിന്ദൂര്‍' തുടങ്ങിയ വിഷയങ്ങളിലെ ചര്‍ച്ചകളില്‍ നിന്ന് പ്രതിപക്ഷം വിട്ടുനിന്ന കാര്യം അദ്ദേഹം ചൂണ്ടിക്കാട്ടി.

2026-27 കേന്ദ്ര ബജറ്റിലെ ചര്‍ച്ചയ്ക്ക് ധനമന്ത്രി നിര്‍മല സീതാരാമന്‍ മറുപടി നല്‍കിയപ്പോഴും പ്രതിപക്ഷം സഭ ബഹിഷ്‌കരിച്ചിരുന്നു.

വികസിത ഭാരതത്തോടോ ആത്മനിര്‍ഭര്‍ ഭാരതത്തോടോ പ്രതിപക്ഷത്തിന് താല്പര്യമില്ലെന്നും രാജ്യം വികസിക്കുന്നതിനേക്കാള്‍ രാഷ്ട്രീയം കളിക്കുന്നതിനാണ് അവര്‍ മുന്‍ഗണന നല്‍കുന്നതെന്നും നദ്ദ ആരോപിച്ചു.