'കന്നഡ ഉത്ഭവിച്ചത് തമിഴിൽ നിന്ന്'.കമൽഹാസൻ്റെ പ്രസ്താവനയ്ക്ക് പിന്നാലെ വൻ പ്രതിഷേധം

ചെന്നൈ: 'കന്നഡ ഭാഷ തമിഴില്‍ നിന്നാണ് ഉത്ഭവിച്ചത്' എന്ന് നടന്‍ കമല്‍ഹാസന്‍. തന്റെ പുതിയ ചിത്രമായ 'തഗ് ലൈഫ്' ഓഡിയോ ലോഞ്ചിനിടെ നടത്തിയ പരാമര്‍ശങ്ങള്‍ കന്നഡ അനുകൂല ഗ്രൂപ്പുകളില്‍ നിന്ന് കടുത്ത വിമര്‍ശനത്തിന് ഇടയാക്കി. 

'നടന്‍ ശിവരാജ്കുമാര്‍ മറ്റൊരു സംസ്ഥാനത്ത് താമസിക്കുന്ന എന്റെ കുടുംബമാണ്. അതുകൊണ്ടാണ് അദ്ദേഹം ഇവിടെയുള്ളത്. അതുകൊണ്ടാണ് ഞാന്‍ പ്രസംഗം തുടങ്ങിയപ്പോള്‍ 'എന്റെ ജീവിതവും കുടുംബവും തമിഴാണ്' എന്ന് പറഞ്ഞത്. നിങ്ങളുടെ ഭാഷ (കന്നഡ) തമിഴില്‍ നിന്നാണ് ഉത്ഭവിച്ചത്. അതിനാല്‍ നിങ്ങള്‍ ആ നിരയില്‍ ഉള്‍പ്പെടുന്നു.'

മണിരത്‌നം സംവിധാനം ചെയ്യുന്ന ചിത്രത്തിന്റെ ശനിയാഴ്ച നടന്ന പരിപാടിയില്‍ കന്നഡ നടന്‍ ശിവരാജ്കുമാറും പങ്കെടുത്തിരുന്നു.

കന്നഡ രക്ഷണ വേദികെ പോലുള്ള കന്നഡ അനുകൂല സംഘടനകള്‍ ഈ പരാമര്‍ശങ്ങളെ അപലപിക്കുകയും കമല്‍ഹാസന്‍ ഇത്തരം പ്രസ്താവനകള്‍ തുടര്‍ന്നാല്‍ ഗുരുതരമായ പ്രത്യാഘാതങ്ങള്‍ നേരിടേണ്ടിവരുമെന്ന് മുന്നറിയിപ്പ് നല്‍കുകയും ചെയ്തു.