കടലിലൂടെയുള്ള ഇന്ത്യയിലെ ആദ്യത്തെ ചില്ലുപാലം കന്യാകുമാരിയിൽ. വിവേകാനന്ദ സ്മാരകത്തെ തിരുവള്ളുവർ പ്രതിമയുമായി ബന്ധിപ്പിക്കുന്ന പാലം നാടിനായി സമർപ്പിച്ച് എം കെ സ്റ്റാലിൻ.

കന്യാകുമാരി: ഇന്ത്യയിലെ ആദ്യത്തെ കടലിലൂടെയുള്ള ​ചില്ലുപാലം കന്യാകുമാരിയിൽ നാടിനു സമർപ്പിച്ചു. വിവേകാനന്ദ സ്മാരകത്തെ തിരുവള്ളുവർ പ്രതിമയുമായി ബന്ധിപ്പിക്കുന്ന പാലം തമിഴ്നാട് മുഖ്യമന്ത്രി എം കെ സ്റ്റാലിൻ ഉ​ദ്ഘാടനം ചെയ്‌തു.

77 മീറ്റർ നീളവും 10 മീറ്റർ വീതിയുമുള്ള പാലത്തിന് 37 കോടി രൂപയാണ് നിർമാണചെലവ്. അത്യാധുനിക സാങ്കേതികവിദ്യ ഉപയോഗിച്ച് നിർമ്മിച്ച പാലത്തിന് ശക്തമായ കടൽക്കാറ്റ് ഉൾപ്പെടെയുള്ള സമുദ്ര സാഹചര്യങ്ങളെ ചെറുക്കാൻ ശേഷിയുണ്ടെന്ന് തമിഴ്നാട് മന്ത്രി ഇ വി വേലു വ്യക്തമാക്കി.

കന്യാകുമാരിയിലെ രണ്ട് പ്രധാന വിനോദ സഞ്ചാര മേഖലകളെ തമ്മിൽ ബന്ധിപ്പിക്കുന്ന ഈ പാലത്തിലുടെയുള്ള വിനോദസഞ്ചാരികളുടെ യാത്ര കടലിന്റെ മനോഹാരിത കാട്ടിത്തരും എന്ന കാര്യത്തിൽ സംശയം വേണ്ട.