/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2026/02/28/untitled-2026-02-28-12-15-49.jpg)
ഡല്ഹി: രാഷ്ട്രീയ നേതാക്കള് ഉള്പ്പെട്ട ക്രിമിനല് കേസുകളില് ദൂരവ്യാപകമായ പ്രത്യാഘാതങ്ങള് ഉണ്ടാക്കുന്ന വിധിയില്, ഡല്ഹി മദ്യനയക്കേസിലെ 23 പ്രതികളെയും സി.ബി.ഐ പ്രത്യേക കോടതി കുറ്റവിമുക്തരാക്കി.
എന്നാല് കേവലം ഒരു വിധി പ്രസ്താവന എന്നതിലുപരി, കള്ളപ്പണം വെളുപ്പിക്കല് നിരോധന നിയമത്തിലെ കടുപ്പമേറിയ വ്യവസ്ഥകള് ദുരുപയോഗം ചെയ്യുന്നതിനെതിരെ ശക്തമായ മുന്നറിയിപ്പും കോടതി നല്കി.
അരവിന്ദ് കെജ്രിവാള്, മനീഷ് സിസോദിയ തുടങ്ങിയവര് അഴിമതിക്കേസില് കുറ്റവിമുക്തരായതോടെ, എന്ഫോഴ്സ്മെന്റ് ഡയറക്ടറേറ്റ് രജിസ്റ്റര് ചെയ്ത കള്ളപ്പണക്കേസിന്റെ നിലനില്പ്പാണ് ഇപ്പോള് ചര്ച്ചയാകുന്നത്.
വിധിയുടെ അവസാന ഭാഗങ്ങളില് പി.എം.എല്.എ നിയമത്തിന്റെ ദുരുപയോഗത്തെക്കുറിച്ച് കോടതി ഗൗരവകരമായ നിരീക്ഷണങ്ങള് നടത്തി. സുപ്രീം കോടതിയുടെ 'വിജയ് മദന്ലാല് ചൗധരി' കേസ് പരാമര്ശിച്ചുകൊണ്ട് കോടതി പറഞ്ഞത് ഇപ്രകാരമാണ്.
'പി.എം.എല്.എ പ്രകാരമുള്ള കുറ്റം സ്വതന്ത്രമായ ഒന്നല്ല, അത് അടിസ്ഥാനപരമായ കുറ്റവുമായി അഭേദ്യമായി ബന്ധപ്പെട്ടിരിക്കുന്നു. അടിസ്ഥാന കുറ്റം എന്നത് കെട്ടിടത്തിന്റെ അടിത്തറ പോലെയാണ്. ആ അടിത്തറ തകര്ന്നാല് അതിനു മുകളില് പണിതുയര്ത്തിയ സമുച്ചയവും തീര്ച്ചയായും വീഴും.'
അതായത്, സി.ബി.ഐ അന്വേഷിക്കുന്ന അഴിമതിക്കേസ് പരാജയപ്പെട്ടാല്, ആ അഴിമതിയിലൂടെ പണം സമ്പാദിച്ചു എന്ന ഇ.ഡിയുടെ വാദത്തിന് നിയമപരമായി നിലനില്പ്പില്ല. ഡല്ഹി മദ്യനയത്തില് ഗൂഢാലോചന നടന്നുവെന്ന പ്രോസിക്യൂഷന് വാദത്തെ തെളിവുകളുടെ അഭാവത്തില് കോടതി പൂര്ണ്ണമായും തള്ളിക്കളഞ്ഞു.
ഭരണഘടനയുടെ 21-ാം അനുച്ഛേദം ഉറപ്പുനല്കുന്ന വ്യക്തിസ്വാതന്ത്ര്യത്തെക്കുറിച്ച് കോടതി വാചാലമായി. വിചാരണയ്ക്ക് മുന്പുള്ള ദീര്ഘകാല തടവ് ശിക്ഷയ്ക്ക് പകരമാകരുതെന്ന് കോടതി ഓര്മ്മിപ്പിച്ചു.
പലപ്പോഴും അടിസ്ഥാന കുറ്റത്തിന്റെ അന്വേഷണം പൂര്ത്തിയാകുന്നതിന് മുന്പേ, ജാമ്യം നിഷേധിക്കാനായി ഇ.ഡി കുറ്റപത്രം സമര്പ്പിക്കുന്നു. വര്ഷങ്ങളോളം ജയിലില് കിടന്ന ശേഷം ഒരാള് കുറ്റവിമുക്തനാക്കപ്പെട്ടാല്, നഷ്ടപ്പെട്ട ആ വര്ഷങ്ങള് തിരികെ നല്കാന് നിയമത്തിന് കഴിയില്ല.
പിഴവില്ലാത്ത നടപടിക്രമം: വ്യക്തിസ്വാതന്ത്ര്യം ഹനിക്കുന്ന ഏത് നടപടിയും നീതിപൂര്വ്വവും ന്യായവുമാകണം. തെളിവുകളില്ലാതെ കേവലം ആരോപണങ്ങളുടെ പേരില് ആളുകളെ തടവിലിടുന്നത് ശിക്ഷാ നടപടിയായി മാറുന്നു.
മനീഷ് സിസോദിയ കേസില് സുപ്രീം കോടതി നടത്തിയ നിരീക്ഷണങ്ങളും വിചാരണാ കോടതി ചൂണ്ടിക്കാട്ടി. അനിശ്ചിതകാലത്തേക്ക് ഒരാളെ വിചാരണയില്ലാതെ തടവില് വെക്കുന്നത് നിയമപരമായ ക്രൂരതയാണ്.
'നീതി എവിടെ നിഷേധിക്കപ്പെട്ടാലും അത് എല്ലായിടത്തുമുള്ള നീതിക്ക് ഭീഷണിയാണ്' എന്ന മാര്ട്ടിന് ലൂഥര് കിംഗിന്റെ വാക്കുകളും 'ആകാശം ഇടിഞ്ഞുവീണാലും നീതി നടപ്പിലാകട്ടെ' എന്ന ലാറ്റിന് വാചകവും ഉദ്ധരിച്ചാണ് കോടതി വിധി അവസാനിപ്പിച്ചത്.
കള്ളപ്പണക്കേസുകള് എത്ര കര്ശനമായാലും അവ ഭരണഘടനാപരമായ പരിധികള്ക്കുള്ളില് നിന്ന് മാത്രമേ പ്രവര്ത്തിക്കാവൂ എന്ന വലിയ സന്ദേശമാണ് ഈ വിധി നല്കുന്നത്.