ഡൽഹി മദ്യനയക്കേസിലെ പ്രതികളെ 'സൗത്ത് ഗ്രൂപ്പ്' എന്ന് മുദ്രകുത്തിയ പ്രയോഗം ഭരണഘടനാ വിരുദ്ധം; സിബിഐയെ രൂക്ഷമായി വിമർശിച്ച് ഡൽഹി കോടതി

ഡല്‍ഹി: ഡല്‍ഹി മദ്യനയക്കേസിലെ പ്രതികളെ 'സൗത്ത് ഗ്രൂപ്പ്' എന്ന് മുദ്രകുത്തിയ കേന്ദ്ര അന്വേഷണ ഏജന്‍സിയായ സിബിഐയുടെ നടപടിയെ രൂക്ഷമായി വിമര്‍ശിച്ച് ഡല്‍ഹി പ്രത്യേക കോടതി.

ഫെബ്രുവരി 27-ന് അരവിന്ദ് കെജ്രിവാള്‍ ഉള്‍പ്പെടെ 23 പേരെ വെറുതെ വിട്ടുകൊണ്ടുള്ള വിധിപ്രസ്താവത്തിലാണ് കോടതിയുടെ ഈ നിര്‍ണ്ണായക നിരീക്ഷണം. പ്രാദേശിക വിവേചനത്തിന് വഴിതുറക്കുന്ന ഇത്തരം പ്രയോഗങ്ങള്‍ ക്രിമിനല്‍ നിയമത്തിന് നിരക്കാത്തതാണെന്ന് കോടതി വ്യക്തമാക്കി.

കുറ്റപത്രത്തില്‍ ചില പ്രതികളെ ഒരു പ്രത്യേക പ്രദേശത്തിന്റെ പേരില്‍ തരംതിരിക്കുന്നത് നിയമപരമായി നിലനില്‍ക്കുന്നതല്ല. 'സൗത്ത് ഗ്രൂപ്പ്' എന്ന് വിളിക്കുമ്പോള്‍ മറ്റ് പ്രതികളെ 'നോര്‍ത്ത് ഗ്രൂപ്പ്' എന്നോ മറ്റോ സിബിഐ വിശേഷിപ്പിച്ചിട്ടില്ല. ഇത് തികച്ചും ഏകപക്ഷീയമായ നടപടിയാണെന്ന് കോടതി നിരീക്ഷിച്ചു.

പ്രാദേശിക സ്വത്വത്തിന്റെ അടിസ്ഥാനത്തില്‍ പ്രതികളെ അടയാളപ്പെടുത്തുന്നത് വിചാരണയില്‍ മുന്‍വിധികള്‍ക്ക് കാരണമാകും. തെളിവുകളെക്കാള്‍ ഉപരിയായി പ്രതികള്‍ എവിടെ നിന്നുള്ളവരാണ് എന്നതിന് പ്രാധാന്യം നല്‍കുന്നത് നീതിയുക്തമായ വിചാരണയെ ബാധിക്കുമെന്ന് ജഡ്ജി മുന്നറിയിപ്പ് നല്‍കി.

അമേരിക്കന്‍ കോടതിയിലെ 'യുണൈറ്റഡ് സ്റ്റേറ്റ്‌സ് വി. കാബ്രേര' കേസ് ഉദ്ധരിച്ചാണ് ഡല്‍ഹി കോടതി ഈ നിരീക്ഷണം നടത്തിയത്. പ്രതികളുടെ വംശീയതയോ പ്രദേശമോ കേസുമായി ബന്ധമില്ലാത്തപ്പോള്‍ അത് കോടതിയില്‍ പരാമര്‍ശിക്കുന്നത് തെറ്റായ കീഴ്വഴക്കമാണെന്ന് കോടതി ചൂണ്ടിക്കാട്ടി.

ഇന്ത്യന്‍ ഭരണഘടനയുടെ 15-ാം അനുച്ഛേദ പ്രകാരം ജന്മസ്ഥലത്തിന്റെ അടിസ്ഥാനത്തിലുള്ള വിവേചനം നിരോധിച്ചിട്ടുള്ളതാണ്. അന്വേഷണ ഏജന്‍സികള്‍ ഇത്തരം പ്രയോഗങ്ങള്‍ നടത്തുന്നത് രാജ്യത്തിന്റെ അഖണ്ഡതയ്ക്കും ഫെഡറല്‍ തത്വങ്ങള്‍ക്കും വിരുദ്ധമാണെന്ന് നിയമവിദഗ്ധരും അഭിപ്രായപ്പെടുന്നു.

സിബിഐയുടെ ഈ നടപടി അങ്ങേയറ്റം ദൗര്‍ഭാഗ്യകരമാണെന്ന് അഡ്വക്കേറ്റ് അശോക് കുമാര്‍ പാണിഗ്രാഹി പറഞ്ഞു. പ്രതികളുടെ ജാതിയോ മതമോ പ്രദേശമോ എഫ്ഐആറിലോ കുറ്റപത്രത്തിലോ രേഖപ്പെടുത്തേണ്ടത് അത് കുറ്റകൃത്യവുമായി നേരിട്ട് ബന്ധമുണ്ടെങ്കില്‍ മാത്രമായിരിക്കണമെന്ന് അഡ്വക്കേറ്റ് ശാശ്വത് സിംഗ് ഗൗര്‍ വ്യക്തമാക്കി.

എന്നാല്‍, ഭൂമിശാസ്ത്രപരമായ തിരിച്ചറിയലിനായി ഇത്തരം പ്രയോഗങ്ങള്‍ നടത്തുന്നതില്‍ തെറ്റില്ലെന്ന് മറ്റൊരു വിഭാഗം അഭിഭാഷകര്‍ വാദിക്കുന്നുണ്ടെങ്കിലും കോടതി ഇത് തള്ളിക്കളഞ്ഞു.